البدلة الزرقه ام خط مش فاكر لونه

عندي بدلة زرقه تحفه فيها خط مش فاكر لونه

غالبا لبني غالبا,,,,,,,,,,,,,, اصل انا مليش في الالوان نهائي

ممكن اقول علي الاحمر سماوي والفحلقي اقول عليه اصفر

مش عمي الوان بس هما تلات الوان الي اعرف اسمائهم

المهم مش ده موضوعنا

لبست البدلة والكرافته الازرق الي فيها خطين برضه مش فاكر الوانهم بس هما بيليقوا علي البدلة ديه

XS BLACK ولمعت الجزمة وضربت كريم علي شعري ورشيتين

ونزلت علي شغلي

اول لما وصلت محطة المترو صعقت من هول المنظر

ما يقرب من تسعين الف بني ادام وقفين علي المحطه

وقفت بين المتزاحمين احلم بمكان فاضي نسبيا متبهدلش فيه

والحمد لله المترو جه

شيلت المحفظه حضيتها في الجيب الجواني هي والموبيل مش طالبه اتسرق علي الصبح

وبقدر ما صعقت من منظر المحطه صعقت من منظر المترو

هما هما التسعين الف بس جوه المترو

وتسعين بره

يبقي 180 الف بالصلاة علي النبي

ولو

هركب مش طالبه تاخير او اذونات

احلي حاجه ان انا وقفت في مكاني وعلي الرغم من كده دخلت المترو برضه في موقف تعجز جميع قوانين الفيزياء عن تفسيره

اعتقد انها نظريه جديده اسمها الحركه السكانه

والنظرية ديه معناها انك تتحرك من مكان للتاني بدون ما جسمك يتحرك

المهم ركبت والي حصل حصل

وعينك ما تشوف الا النور

منظر مفزع,, كتل لحم بشريه هلامية مهلبيه متراصه بجوار بعضها البعض

ومفيش مجال نهائي انك تتنفس

بس الحمد لله المصريين قدروا يتجاوزا الموضوع ده بسهولة

بقي كل واحد ياخد شهيق يدي لاخوه الي واقف جنبه زفير

وهكذا لحد ما يوصل الزفير لحد اقرب شباك يخرجه ويستبدله بهواء صالح للتنفس

ونعم التعاون!!!!!!!!!!!!!!!!!!!!!!!!!!!!!!!!!!!!!

فجاة وانا واقف لقيت البدلة بتتحرك

يا نهار ازرق

في ايه

لاقيت شاب ظريف مكنش لاقي مكان يقف فيه

فختار المكان ما بين صدري وبطني عشان يريح فيه

وراجل تاني خد تعسيلة خفيفه علي كتفي

واخيرا وبعد طول سنين لاقيت فايدة لتمارين الرست الي كنت بعملها زمان

الاخوة الركاب قدروا يستخدموها كعمدان عشان ميقعوش علي بعض

اصل انا طويل حبتين والطول بينفع اوووي في الحلات ديه خاصه لو كنت بتلعب رست زمان

طبعا مش هحكيلكم علي الخنقات الي حصلت بين الركاب

عشان الناس الي قاعده تفتح الشبابيك عشان الناس الي واقفه تتنفس

واتفرج علي الحقد

واحد واقف بيقول : افتحووووووووووووا الشبابيك مش كفايه انك قاعدين

بس للامانة كان عندهم حق

انا اول ما دخلت المترو النظارة الشمس شبرت مرة واحدة

وده معناه ان الجو ملايان بخار مية (ارجع لموضوع الشهيق والزفير)

المهم وصلت للمحطه بتاعتي وبعون الله قدرت انزل عشان الاقي

البدلة الزرقه بقي لونا رمادي فاتح

الكرافتة بقت كوفية سوهاجي

البرفات بقي خمس خمسات

adidas الجزمه المتلمعة بقي كوتشي

عاااااااااااااااااااااااااااااااااااااااااااا

قعدت الملم شتات نفسي وخدت نفس عميق بعد ما اتاخرت علي شغلي ساعه الاربع كاملة

انا مش زعلان عشان الجزمة

او البرفان

انا زعلان علي التسعة جنيه الي كنت صارفهم علي البدلة غسيل ومكواة!!!!!!!!!!!!!!!!!!!!!!!!!