الجمعة، شعبان ١٨، ١٤٢٨

اصدقائي الاعزاء........شكرا

الي كان يعرف اني مكتئب يقراء الكلام ده لانه ليه
الي ميعرفش ينزل يقراء البوست الي تحت لسه كاتبه من نص ساعه
انا لو كنت مكتئب قيراط بعد ما قريت تعليقاتكم بقيت متفائل اربعه وعشرين قيراط
الي يقفوا جنب انسان ميعرفهوش ويساندوه ويحاولوا بكلام رقيق جدا ومحفز جدا جدا انهم يخرجوه من الحاله الي هو فيها
يبقي ميكنش عنده حق في الاكتئاب
اصدقائي الاعزاء انا للاسف مش هقدر ارد علي تعليقاتكم الي سبتوها في بوست اعراض اكتئاب
لاني مش هلاقي كلام ارد بيه
اصدقائي الاعزاء........شكرا
شكر خاص جدا لكل من
فنان فقير , لعب عيال
ما علينا , كلمات , والقادم اجمل
شمعه امل , هوندا , بووسي
سمسم , ميرو , سجده , اسلام
بنوته , قسمت , الحلم العربي

الخميس، شعبان ١٧، ١٤٢٨

احنا الجيل الصاعد


احنا الجيل الصاعد احنا الجيل

نشيد كنا بنغنيه في المدرسه كان بيصحي اي حد في نطاق تسعميت ميل


اه لو كنا نعرف


احنا جيل ماما نجوي وبقلظ وماما عفاف الهلاوي

احنا جيل مازنجر وافردويت وكابتن ماجد كل يوم علي القناة التالته الساعه عشره

احنا الجيل بتاع فجر الاسلام في المولد والرصاصه لاتزال يوم سته اكتوبر

احنا جيل حرب الخليج الاولي والتانيه والتالته

احنا الجيل الي اتضحك عليه وهو صغير

واضرب علي قفاه وهو كبير

احنا الجيل الي ضيع مصروفه علي الكولا عشان العجله

احنا الي خرجنا من اعدادي كلنا بنقول هندسه وطب

احنا الجيل الي قالك ياشرطه يا حربيه وسقطنا في الاتنين

وخرجنا من ثانوي علي تجاره وحقوق ومعهد خدمه اجتماعيه

وخرجنا من الكليه علي قهوه السمسميه عدل

احنا الجيل الي قاطع البودره

واحنابرضه الجيل الي حب البانجو وعشق الحشيش

احنا جيل علي حميده وهشام عباس وسيمون

احنا جيل عمرو ومنير

احنا الجيل الي ستين في الميه منه عنده اكتئاب

احنا الجيل الي شرب مية مسممه وفاكهه مسرطنه واكل مليان مبيدات

احنا الي خرجنا في مظاهره فلسطين والعراق وسوريا ولبنان

واحنا الي اهلينا اتضحك عليهم في الريان

احنا جيل همام والسقا وعلاء

جيل اللمبي والحركات

وبطالنا نشيل محافظ!!!!!!!عشان معندناش جيوب وراء

احنا شباب تعبان

وبنات حيرانه

مش عارفين نحب

مش عارفين نتحب

مش عارفين نعمل اي حاجه

غير اننا نتكلم

ونكتب في بلوجتنا

عن احلامنا

عن طموحتنا

عن الي كان ممكن نعمله


لو مكناش من هذا الجيل


احنا شباب الجيل الصاعد احنا الجيل

الأربعاء، شعبان ٠٩، ١٤٢٨

أعراض اكتــئاب واضحه


أنا من زمان عارف اني بحب مصر

بس يجيلي اكتـــئاب بسببها مكنتش اتصور


مشاكل في الشغل

سجائير كتير

قهوه كتير

اكل كتير

قله نوم

وبعد كل ده حال البلد زفت

أنا بحب مصر بس مش قادر استحمل الي بيحصل فيها

انا معتكف لحين اشعار اخر

او لحد ما البلد تتصلح

ايهما اقرب

خلاص


هي بلدنا خلاص باظت

خلاص بقت ملايانه حراميه وفساد وسؤء اداره وتخطيط

خلاص بقي شعبنا متخاذل بيتفرج علي البنات وهدومها بتتقطع في الشارع من غير ما يتدخل ده لو مكنش مشارك

خلاص رضينا بحكم فاسد من غير ما نفكر نغيره

خلاص رضينا نتحكم بالحديد والنار

خلاص ادمنا السرطان والتهاب الكبد والفشل الكلوي

خلاص اترمينا في دوامه العيال والدروس وكروت الشحن

خلاص اسلامنا بقي حجاب وصلاة جمعه وصلاة عيد لو صحينا بدري

خلاص اعتمدنا علي الرشوة والمحسوبيه والشاي بتاعي وحلاوتي يا بيه

خلاص نسينا فلسطين والمسجد الاقصي

خلاص اتعودنا علي المهانه و الذل بره البلد وجوه

خلاص شبابنا ياما في المعتقل ياما تايه من المخدرات يا ما بيدور علي شغل ياما واخدها عوم لايطاليا

شكلها كده خلاص

شكلها باظت

السبت، شعبان ٠٥، ١٤٢٨

اتصل اتصل


وين اهل السعوديه انتوا نايمين ولا ايه

يلا اتصل اتصل يلا اتصل

معانا جايزه 100,000 دولار لسعيد الحظ اتصل اتصل

مخرجنا بيقول اهل العراق نايمين وانا بقوله لا هما صاحيين اتصل (اهل العراق سابوا الغلب والقتل الي هما فيه وبيكلموا استرايك) اتصل

سوالنا سهل ولذيذ خالص وبالسمن البلدي " ماهو النهر الذي يجري في مصر" يلا اتصل وين اهل مصر

التليفون يرن: ممكن اشترك

الاخت المذيعه : طبعا انت من وين

المتصل: انا من بولاق

الاخت الظريفه: اهلا بكل اهل مصر واهل بولاق. سؤالنا ماهو النهر الذي يجري في مصر قدامك 30 ثانيه

المتصل:مممممممممم اه نهر الني......................................تتدخل المذيعه الو الو وينا مشتركنا الامووور يظهر الخط قطع

الاخت العسوله: حاول تاني واتصل اتصل تلفوناتنا في مصر 09999999010

التليفون يرن: هلا

الاخت الغلسه: هلا بيك من وين

الاخ الغلبان: والله انا من اليمن

الظريفه: هلا بيك وبكل اهل اليمن السعيد

الاخ : مخلاص بقي مبقاش سعيد

الاخت المستفذه: يلا مش مهم,,,,, عارف الاجابه

المتصل: اه طبعا نهر النيل

الاخت الدلوعه: ووووووووووووووووووووووووووووووووووووه برافوا عليك

المتصل : ايه ده يعني كسبت ال 100,000 دولار

المذيعه : لا لسه شويه لسه سوالين

الاخ : ارغي

المذيعه المثقفه: ايه هو الرقم الذري لجزئي الماغنسيوم المختلط بالماء الثقيل وعليه معلقه سكر ووواحده

الاخ المصدوم: ممممممممممم فتره تفكير طويله ويقول اتنين وسبعين

الاخت الي عايزه ضرب النار : لا للاسف اجابتك غلط اتنين وسبعين ده الي عليه معلقتين سكر حاول مره اخري

اتصل اتصل

الأربعاء، شعبان ٠٢، ١٤٢٨

العدد في الليمون


خمساتشر الف وسبعمائه مدونه مصريه خالصه مخلصه

بسEGYPT دول الي كاتبين

غير بقي الي كاتبين مصر غير الي بره مصر

يعني بالصلاة علي النبي كده نعمل عشرين الف مدونه

ربنا يزيد

الثلاثاء، شعبان ٠١، ١٤٢٨

ارض الخوف


في هذه الايام عشت اكتر ايام حياتي حيويه

أشتعلت جذوه

واشعت حرارتها في كل حياتي

كنت اعيش حاله خاصه

فقد كان عندي تصريح أخلاقي لكل فعل اريده

يشمل كل شئ بلا قانون محدد ولا حتي ضابط أخلاقي الاتقديري الشخصي بما ينجح مهمتي


هربت وبعت وكسبت وخسرت وهوجمت وقتلت وغؤيت واغتنيت


كل هذا كان من اجل هدف اسمي

يرفع عن كاهلي الخطايا ولكنه لا يحميني من الاخطاء


لذلك فقد كان ارتكاب الخطايا اسهل بكثير من ارتكاب الاخطاء

الأحد، رجب ٢٩، ١٤٢٨

كده رضا


مسير الصغير يكبر


جيل الشباب من الممثلين

مثل محمد سعد واحمد حلمي وعلاء ولي الدين وهنيدي والسقا

يعتبر جيل محظوظ نسبيا

فبعد العديد من السنوات المظلمه في حياتهم

وبعد عشرات الادوار الهامشيه لهم

ابتسم الحظ لهم واعطاهم فرص حقيقيه لم يعطيه لاجيال سبقتهم

ولكن المشكله دائما في ان الحفاظ علي النجاح اصعب من الوصول له


توفي علاء ولي الدين رحمه الله بعد نجاح ساحق لعبود والناظر وخساره فادحه لابن عز


محمد هنيدي بعد صعود نجمه الي السماء السابعه بعد كامننا وصعيدي في الجامعه وهمام لم يستطع الحفاظ علي هذا المستوي وانخفض حب الناس له بعد بليه وخالتي واخيرا عندليب الدقي


احمد السقا استطاع بادور الاكشن ان يخلق لنفسه ادوار جيدا

بدون مجهود يذكر في التمثيل ولكنه غير تلك النظره للجمهور في تيمور وشفيقه


محمد سعد للاسف لم يستطع ان يظل الحصان الاسود للنهايه

غروره الشديد وتدخله في كل ما يخص الفيلم ادت بتدهور افلامه من سئ الي اسوء الي كركر


الجوكر احمد حلمي استطاع ان يقدم نفسه في افلام ك عمر 200 ورحله حب تقديمه ناجحه كممثل قد لانحبه ولكننا لايمكن ان نكرهه

خرج احمد حلمي من شخصيه عاطف الذي لا يعلم عنه احد في الناظر

الي 55 اسعاف علي الرغم من انه لم يلقي نفس النجاح

مرورا ب ميدو مشاكل الذي حقق نجاح جماهيري جيدا لمجهود حلمي ولتواجد شيرين

فتح الباب علي مصرعيه امام حلمي في سهر الليالي وتاكد المنتجون من قوته كممثل وادخلوه عالم الكبار

زكي شان , مطب صناعي , جعلتني مجرما , صايع بحر , ظرف طارق

كلها افلام تعتبر تيمه واحد عن شاب فقير يبحت عن فرصه جيدا للعمل او حب حياته وهذا احزنني لانني اعتقد انه ممثل اكبر من ذلك

حتي خيب حلمي امالي وفجر في وجهي مفاجاة كده رضا

عبقريه الاداء المتميز لكل شخصيه

الاختلاف التام والواضح لكل شخصيه التي لا تجعل مجال للشك في ان حلمي هو فنان عبقري قادر علي تجسيد وتقمص العديد من الشخصيات سواء كانت كوميديه او تراجديا

استطاع حلمي ان يتفوق علي جميع اقرانه وزملاء جيله في

التمثيل والمحافظه علي النجاح والتقدم الي الامام وان كان هذا التقدم بطئ

وهذه نقطه في صالحه وليست ضده

ولا ننسي ان حلمي هو الممثل الوحيد حتي الان الذي لم يتعرض احد افلامه الي الخساره

علي عكس هنيدي وسعد وعلاء ولي الدين وينضم اليه احمد السقا بالتاكيد


اسعدني حلمي طوال ساعتين بفيلم اكثر من رائع استطاع ان يضحكني ويحزنني ويدهشني ويبكيني
اتمني ان يحافظ احمد حلمي علي هذا النجاح ولا يقع في ما وقع فيه الاخرون

احترسوا ايها النائمون فجوكر السينما المصريه قادم اليكم..........ا

الأربعاء، رجب ٢٥، ١٤٢٨

الإنكشارية



حد سمع عن الناس الي فوق دول

الناس العاديه هيقولوا لا

الي تعبوا شويه في تاريخ ثانويه عامه هيقولك انا سمعت اسماء الناس ديه قبل كده

العباقره الي زي و جايبين 49 من خمسين في التاريخ هيقولولك الاتي


الانكشارية

هي فرقه عسكريه تم تدريبها من الصغر علي حمل السلاح والفروسيه والمبارزه وحجات تانيه كتير

وكانت السبب الرئيسي في قوة الدوله العثمانيه

تحول الانكشاريين الي قوة غاشمه يسرقون القروي والنجوع ويقتلون الافراد ويفرضون الاتاوات


محمد علي لما دخل مصر امر جنوده انهم ميقربوش منهم عشان السلطان العثماني ميزعلش منه

بعد فتره من الظلم محمد علي حب ياخد بنط عند الشعب المصري

فقال لجنوده انهم يمنعوا الانكشاريه من تنفيذ هذه الاعمال حتي لو وصل الامر لاستخدام القوه


انتهي الحال بالانكشاريه بمذبحه كبيره في استنابول سميت بالمذبحه الخيريه


.
.
الشرطه المصريه بتفكرني اليومين دول بالقوات ديه
بلاش نقول كل الظباط
جزء كبير منهم
بيفرضوا اتأوات واسالوا سواقين الميكروباص
بيعذبوا ناس وادخلو علي يو تيوب واكتبوا ظابط مصري وانتوا تشوفوا
بيقتلوا ناس سواء من كتر التعذيب او بالقصد
هي مصر لسه بلد الامان ولا خلاص بقت ملايانه انكشاريه

.
.
.

الثلاثاء، رجب ٢٤، ١٤٢٨

لقاء علي الهواء


استضافتني المذيعه هوندا لتسالني عن رائئ في موضوع ساعات النت والهبل الي وزارة الاتصالات عايزين يعملوه ودار الحوار الاتي



ما هو مدى أستخدامك للأنترنت ؟؟


ميل , بلوج , شات


كيف ترى هذى الحملة وما مدى تأثيرها على المستخدمين والمختصين ؟؟


الحملة ديه هدفها لم فلوس سعاتك

والقضاء علي الشبكاتك حضرتك

ومقاومه البلوجرين امثالنا


ما رأيك بقرار وزير الاتصالات الجديد ؟هل سيساهم بنشر خدمة الانترنت فى مصر ام هل سيؤدى الى تقلصها؟؟

هيخسف بيها الارض حضرتك


ما هى اسباب الوزير المعلنة والغير معلنة فى رأيك ؟؟؟؟

هي صورة مانا قولتلك قبل كده

صوت قلم جامد علي افه الزبون والكاميرا تتهز والمذيعه بتضحك


من هم المستهدفون بهذا القرار ؟

اي انسان بيقول رايه بصراحه في البلد

اي صحفي مش لاقي لنفسه مكان في جريده

المدونون الاخوان

المدونون عموما

الواد سيد زلموكه الي بيسرق شرايط عمرو دياب وينزلها قبل معادها


هل تهدف الحكومة من هذا القرار بتطبيق المبدأ العربى الشهير الا وهو فرض الوصاية على هذا الشعب القاصر ( من وجهة نظر الحكومة ؟

ينظر الظابط الي المواطن نظره طويله

وهو يمسك عصايا مقشه في ايده متوعدا

يقوم المواطن برفع كمر البنطلون الي اعلي في حرص ويقول

يا سعاده حضره المدمازيل وفيها ايه يعني لما الحكومه تمارس حقها الشرعي في انها تحافظ علينا

اما انك مذيعه غلسه صحيح


كيف ستتراجع الحكومة عن قرارها ؟بالضغوط الشعبية والتفاعل الحيوى للمتضريين من الشباب والشعب؟

مش هتتراجع

وانا هو وانتي اهو


كيف تصف هذا الحدث ؟؟

كتر الحزن يعلم البكاء


هل يستحق وزير الاتصالات الائتمان على أمن مصر المعلوماتى وصناعة التكنلوجيا بمصر؟؟؟بعد ان أثبت سوء نيته و مشروعة الذى يهدف الى تدمير البنية التحتية لصناعة المعلومات فى مصر؟؟

بالتاكيد يستحق

عيش ندل تموت مستور


ماذا تتوقع من تفاعل هذى الحملة عالميا وعربيا ومحليا ؟؟؟؟

زوبعه في فنجان

ولا هتاثر



ما هو الحل فى رأيك ؟؟

نقعد في بيتنا نستنا القضاء المستعجل


هل ترى ان نجاح الحملة يتمثل فى:1- - اقالة الوزير الجاهل بمعايير صناعة التكنلوجيا ومواكبة التطور2- التراجع عن القرار فقط3-وضع نظامين تحت بند اختيارى

ولا حاجه من دول

لان الحمله مش هتنجح


ماذا ترى فى المناورة الاخيرة للحكومة تحت ضغط المرحلة الأولى من الحملة ؟؟؟؟

الحكومه المصريه بتتاعمل مع الشعب المصري بمنطق اهدا علي الرز

سيبوهم يجعجعوا وهنعمل برضه الي احنا عايزينه


الظابط يقترب من المواطن

المواطن يمسك حزام البنطلون وتجيله حاله هووووس ويزعق وهو بيجري

بلاش العصايا والنبي

الاثنين، رجب ٢٣، ١٤٢٨

تاج


ا ( الاستاذه ولاء صاحبه مدونه القادم أجمل بعتيتلي تاج ونصه كالاتي)ا


اسم مدونتك؟؟

انا مش معاهم


لماذا اخترته.. وماهى نيتك من وراء اختياره ؟؟؟

مصر فيها قوتين سياسيتين الحكومه من طرف والاخوان وكفايه من طرف تاني وللاسف الاتنين مش بيعبروا عن الشعب المصري

انا بقي مش مع دول او دول انا مع المصريين


صورتك فى المدونه رمزيته؟؟

عيل صغير بياكل بطيخه

بيرمز لحب العيال الصغيره لااكل البطيخ


هل فكرت فى اغلاق مدونتك والسبب؟

لا

عشان بحبها


حد قل ادبه فى التعليق .. ايه رد فعلك؟؟

اه

قالي ان انا المفروض اروح جوانتناموا

رديت عليه وقولتله ان هو مبيفهمش

بس بطريقه مؤدبه ومستفزه في نفس الوقت


اسوأ مدونه؟

مش عارف

بس كل مدونه بتعبر عن رائ صاحبها


حايحصل ايه للأيميل لما تموت؟؟

هيموت معايا


اديت الباسورد لحد قبل كده ؟؟

لا


اسمك؟

محمود


عمرك؟

22


برجك ؟

الحوت


مجال دراستك ؟

محاسبه


السفر بالنسبه لك؟

اجمل حاجه في الدنيا

سواء في مصر او بره مصر بس مبعدش عنها كتيير


المود بتاعك؟؟

عادي

وقت الضحك ضحك ووقت الجد ضحك برضه


وقت فراغك بتعمل فيه ايه؟

انا بعد ما اشتغلت بقضي وقت فراغي في النوم

قبل كده كنت بنام برضه


الاكله المفضله؟

اي حاجه عليها باشميل

خاصه لو مسقعه او كوسه


الصفات اللى اخذتها من بابا ؟

العصبيه


الصفات اللى اخذتها من ماما؟

العصبيه برضه


اكتر ست حاجات بكرها؟

اروح البيت ملاقيش اكل

اوصل شغلي متاخر

حد يتاخر عليه

اطلب اكل دليفري ويتاخر

اطلب اكل دليفري ويجي ناقص

اي حاجه تضيع مني ومعرفش اوصلها


لماذا دخلت عالم التدوين من الأساس ؟

مكان الواحد يقول في رائيه وناس ترد عليه من غير نفاق


احلى جمله قيلت فى وصف مدونتك؟

مش عارف

بس اي رد بيرضيني

لان في انسان شغل وقته بانه يرد علي كلامي


التعليقات .. بالنسبه لك اهميتها؟

نفس الموضوع



احلى بوست كتبته؟؟

مش فاكر

بس مش انا الي بحدد


افضل مدونه قرأتها ؟؟


البراء اشرف


افضل بوست قرأته؟

مش فاكر


الشغل بالنسبه لك؟

تعب ومجهود وتشغيل دماغ


الانترنت بالنسبه لك؟

اخويا الصغير



الحكومه الذكيه


الحكومه المصريه تعامل شعبها من منطلق انه شعب غبي جاهل لايقدر علي التفكير والحركه والابتكار

انظروا الي تعليقات الوزراء والمسئولين في الازمات المختلفه

تعليقات عقيمه غبيه لا تستطيع ان تقنع طفل صغير

محافظ الدقهليه : ازمه المياه بسبب استحمام المواطنين

محافظ المنوفيه : المواطن ينبسط بليل واحا ندبس الصبح (اشاره للواجبات الزوجيه )ا

وزير الصحه : السنه القادمه خدمات الاسعاف ستكون جويه ونهريه وبريه

وزير الاسكان : سوف يظل مواطن مصري يبحث عن المياه بحله حتي سنه 2075

مسئول مش فاكر اسمه : السنه القادمه لن يكون هناك مواطن واحد يبحث عن المياه

وزير الداخليه : لا اعلم عدد المعتقلين في مصر

رئيس الوزراء : الشعب المصري شعب قاصر سياسيا وغير قادر علي ممارسه السياسه