مصر

انا بحب البلد ديه

انا بحب مصر

اهلي وصحابي وجيراني

شارعنا, حتتنا, ولاد عمي وولاد خالي

بحب سعد بتاع الفول الي لو لفيت الكره الارضيه ست مرات مش هتلاقي طبق فول زي الي بيعمله

بحب الكورنيش ووسط البلد وشوارع مصر الجديده

بحب منظر الولاد الصغيرين وهما راحين مدارسهم

بحب منظر البحر في اسكندريه واللسان بتاع راس البر والبوريفاج بتاع جمصه

بحب منظر الجبل الي في الزعفرانه وميه البحر بتاع مرسي علم

بحب الاربعين في السويس , والمكس في اسكندريه ,وميدان الساعه في طنطا

بحب الارض الخضراء الي في بلدي

بحب الفطير والعسل والجبنه القديمه

بحب المسقعه الي بتعملها امي والكوسه الي بي البشمل الي بتعملها ماما محمود زميلي

بحب زيزو النتن وفرحات وسلطه الخضار بالمايونيز الي بيعملها التابعي

بحب اول يوم رمضان , وكحك العيد , والعيد الكبير لما نروح ندبح عند الجزار

بحب قهوه السمسميه وقهو سفير وديفرنت كافيه

بحب اهل مصر وناسها بكل سلبيتهم واخطائهم وعادتهم

بحب كل شوارعها بزحمتها وميكروبصاتها والعسكري الغلبان الي مش عارف هو واقف في ميدان ايه

هي بلدنا كده شروا واحده ومفهاش فصال وبين الشاري والبايع يفتح الله

يا تعشقها وتموت في ترابها يا تهرب منها وتعيش بقيه حياتك نفسك ترجعلها

يااااااااااااااااااااااااااااه يا بلد

كل ما أكره فيكي حاجه كل ماحبك زياده

حق الرد

انا اول ما عملت المدونه ديه قعدت كل يوم ادخل عليها وارقب العداد واشوف في ناس عبرتني ولا لا

هو صحيح اهلي واصحابي قروا الي مكتوب فيها وشجعوني

بس اول مره حد يبعتلي تعليق علي الي انا بكتبه

حد معرفوش قرا كلامي وحب يعقب عليه وده في حد ذاته انجاز كنت اتمني اني اوصله

اول تعليق رسمي كان من استاذه دعاء الشامي صاحبه مدونه بنت بلد وفرحت بيه جدا

تاني تعليق كان تهزيق

اه والله

واحد قالي ان انا مليش غير اني اروح جوانتناموا

وبعديها واحد دخل في شمال وقالي ان انا مصادري سكه وان انا غلطان في الي انا بكتبه علي موضوع مظاهره عين شمس

بس انا فعلا في اليوم ده شوفت المنظر بعنيه محدش حكالي

اما بالنسبه لموضوع المصادر السكه انا مصادري مش سكه انا الي فهمت غلط

وانتوا عندكم حق الميه مكنتش مقطوعه في النعام اما بالنسبه لموضوع المظاهره فانا شوفنها بعنيه

شكرا للاستاذ بتاع جوانتناموا وشكرا للاستاذ بتاع المصادر السكه

واتمني اني مروحش جوانتناموا لاني لو روحت هسبب مشاكل كبيره للامريكان لانهم معندهومش بدل برتقاني علي مقاسي

مذكرات طالب فاشل

لا ادري سبب فشلي الدائم في المذاكره

أفضل دائما ان القي لوم هذا الفشل علي عاتق الحكومه والشعب والهواء الفاسد والمياه الملوثه واستاذ عبد الكريم بتاع الانجليزي الي قطع صوابعي ضرب علي اساس اني افهم ولم افهم ولن افهم

والحقيقه انني حتي الان لا اعرف سبب ذلك العزوف الدائم عن المذاكره ومدي اشتياقي الي النوم كلما فتحت كتاب ومدي سعادتي ونشاطي في الاجازه

ان خيروني يوما في دوله متحضره ماذا ادرس

وجلست امام هيئه من العلماء والادباء والمفكرين ليسالوني ماذا تحب ان تدرس

لخترت الزراعه , او الالات الصناعيه , او الادب والتاريخ والموسيقي والفن

انا اعلم ان كل ما ذكرته من علوم هي علوم صعبه وتحتاج الي مجهود ودراسه ومراجع وابحاث

ولكن الفرق هنا انني قد ادرس ما احب وليست محاولاتي الفاشله دائما لاحب ما ادرس

انا احب التاريخ والرسم والموسيقي

واكره الرصيد الدائن الذي يجب معالجته في فروق التحميل حتي تكتمل الميزانيه وتتساوي ارصدتها وتتلاقي افكارها وتزيد ارباح الشركه

انا اكره محاسبه البنوك وشركات التامين ومكاتب المحاسبه وضريبه الاطيان الزراعيه وضريبه النشاط المهني الحر الغير تجاري

انا اكره كليه تجاره جامعه عين شمس محطه مترو منشيه الصدر بالقرب من العباسيه بحي الوايلي بمحافظه القاهره بجمهوريه مصر العربيه بقاره افريقيا

انا اكره ان يعاملني الدكتور كانني غبي لا افهم في هذه الدنيا شي

اكره ان يتخيل نفسه نبي مرسل فاق الدنيا وما فيها

اكره كوني لم اكتب بحث يوما

اكره كوني طالبا

لانني كلما تذكرت كوني طالبا تذكرت مدي فشلي في ان اكون طالبا

اعلانات

اعلان واحد

زعلان

معندكش عيال

انت ومراتك بتموتوا لما تشوفوا عيال بتجري في الشارع

نفسكوا في عيل يملي عليكم الدنيا

"المال والبنون زينه الحياه الدنيا"

الان والان فقط علبه الخصوبه الطبيعه من شركه فسفيسو للانجاب عن طريق الاقمار الاصطناعيه

علبه المعجزه

انها دواء من كل الاعشاب الطبيعيه في العالم

كل ما تتخيله

عشر تيام وتلاقي معاك زوربه عيال

العلبه بتسعه وتسعين جنيه وعليها واحده هديه

اعلان اتنين

قرفان زعلان

مراتك مضهاك في عيشتك

مش عارف تثبت نفسك في البيت

حماتك بتعايرك طول النهار

الحل في العلبه ديه

علبه العفريت

اقوي منشط حيوي في العالم

لاتقولي بودره ولا كتاكيت مفيش غير علبه العفريت

معروف علي مستوي العالم وله شهره مدويه

السبب الرئيسي في غلق مصانع الفياجرا بالمانيا والسويد والنمسا والمجر

نحن نصدر لجميع الدول العربيه والعالميه

العلبه بتسعه وتسعين جنيه وعليها واحده هديه

والان ولفتره محدوده يوجد علبه العفريته للنساء فقط

اعلان تلاته

بصي يابني من الاخر كده لو عندك اي مرض في العالم هنعالجه

الان عسل عم سيد زلموكه الجبلي (العسل مش عم سيد)ا

لعلاج البهاق والصدفيه والتبول الااردي والعجز والكوليرا والتهاب الكبد والصلع والتسمم وقرصه العقرب ولو اضافتيله شويه لبن هيطلع العفاريت كمان

العلبه بتسعه وتسعين جنيه وعليها واحده هديه

فيه شفاء للناس

جمعيه حموم الانسان

فازت مصر بعضويه المجلس الدولي لحموم الانسان وده لدورها الكبير في الاهتمام والحفاظ علي حموم الانسان في مصر

يعني بعد كده يما تروح القسم بدل ما تتلسع علي قفاك هيطلب منك المخبر بكل احترام تحب تتضرب علي قفاك ولا تتعلق علي الحيطه

لاحظ يا سيدي المواطن انه في حاله انك وافقت علي ان تضرب علي قفاك هتاخد اوووفر زياده وتتكهرب في حين انك لو قررت انك تتعلق علي الحيطه هتاخد اوووفر تاني وهو انك هتتضرب بكبل كهرباء

ولو قعدت علي الحيطه اكتر من خمس سعات من غير ما تعترف انك الي قتلت هتلر وولعت في عربيه الملك فواد هتاخد اوووفر تاني ظريف جدا وهي ""عصايه الغليه"" والي مفهمش قصدي عن عصايه الغليه يعمل سيرش علي جوووجل عن عماد الكبير

السعوديه واحد

خرج علينا السيد الرئيس بتصريح عنجهي انه يرفض بناء كوبري بينا وبين السعوديه

انا معرفش فعلا الكوبري ديه كويس ولا وحش زي هو مقال وميهمنيش اني اعرف علشان معرفتي او عدم معرفتي مش هتاثر كتير لانه اورلدي خد القرار المشكله

ان سعادته خد القرار ده من دماغه لاعمل لجنه تفحص وتسال ولا سال مجلس الشعب ولا حتي جاب اتنين مهندسين حديثي التخرج عشان يفتوله في الموضوع ده شويه

قرف من السعوديه او اتخانق مع الملك قام طالع قيالهم طيب يا ولاد.........ا

والله ما انا عامل الكوبري هاه ه بقي والله ما انا عمله

ولا عزاء لسبعين مليون بني ادام

انا عارف ليه الرئيس خد القرار ده خايف للميكروباصات تشتغل في شرم الشيخ والواد بكوووله التباع يلف علي قريه قريه ويصرخ باعلي صوته السعوووووووووووووديه واحددددددددددددددد

بشري لمستخدمي مترو الانفاق

بشري ساره الي جميع مستخدمي مترو الانفاق استطاعت معامل العفرين الطبيه التوصل الي اختراع جديد سيودي الي ثوره في عالم النضافه الشخصيه

لقد اخترعوا الصابوووووووووووووووووووووووووووووووووووووووونه

وهو اختراع ظريف للغايه حيث انه يؤدي الي اختفاء الروائح الخبيثه والحد من ابتعاد الاشخاص عنك

وطرق استخدامه سهله للغايه وهو الامساك بالصابونه جيدا ووضع عليها بعض الماء فتقوم باحداث رغاوي قويه مع قليل من الماء الساخن وتقوم بطس ووشك بهذه الرغاوي مما يودي الي حاله من النضافه الشخصيه والجسديه

وقد قام نفس المعمل بانتاج اختراع مذهل لايزال قيد التجربه وهو مزيل العرق ويوجد منه عده انواع منها الاسبراي والرول اون والكريم وجميعها صالحه للاستخدام الادمي

مرفق صور لتلك الاختراعات ليسهل للمواطنين الوصول اليها

""ارحموا من في الارض يرحمكم من في السماء""

المشكله مشكله يووووزر

الحكومة تدرس إصدار بطاقة ذكية موحدة لجميع وسائل المواصلات

صباح الفل علي اجمد ادمغه في الوطن العربي دماغ حكومتنا المصونه

الحكومه بتاعتنه حكومه رشيده وذكيه وسنيه وفوزيه الخ الخ

عارفين الي لاقي لقيه ومش عارف يعمل فيها ايه او الي لقه فرخه بتبيض دهب فعايز يدبحها علشان ياخد الكنز الي جواها

اهو احنا حكومتنا بتعمل فينا كده

مره تسمع عن كارت للمياه ومره كارت للكهرباء ومره كارت عن عدد مرات دخول المواطن للحمام(لاعزاء للناس الي عندها تعنيه) واخره الحوار عايزين يعملوا كارت للمواصلات

اذا كان المتحدث مجنون يبقي لازم المستمع يكون عاقل واحده واحده ونتكلم براحه من غير زعيق

افرض يا باشا الصبح وانت نازل علي شغلك او مدرستك او معهدك او حتي رايح تعاكس بنات علي الكورنيش وقف الاتوبيس وركبت وقمت معدي الكارت بتاعك قامت المكنه صوتت هتعمل ايه يا بووب

هتحلف براس ابوك ان العيب في المكنه

هيرد عليك المحصل بعد ما يولع سيجاره ويشفط بق شاي من المج الي قدامه وسيبينه كده بعد المكنه ما استولت علي شغله تحصيل حاصل يعني(المحصل مش المج)ا

لا يا مواطن الكارت بتاعك هو الي بايظ اووقف يا سعيــــــــــــــــــــــــــــــــــــــــــــد(سعيد ده السواق) وايد ورجل يا معلم وتلاقي نفسك علي الاسفلت

تستهدي بالله وتجري علي اقرب محطه مترو وتروح تركب,,, هو هو الموقف الي فات بالظبط بس اترميت علي القضبان

مش مهم لا حياه مع الياس

تجري علي اقرب ميكروباص وتركب وتطلع للسواق الكارت

هيبصلك بصه طويله بعنيه المحولين من كتر المخدرات ويطفي السيجاره الي في ايده بعد ما ياخد نفس طويل ويفتح المطوا ويغزك في رقبتك وتبقي ضحيه الكارت الذكي رقم تسعميت الف

مشكله التكنولوجيا في مصر مش في التكنولوجيا نفسها المشكله في الناس الي بتطبقها

مجموعه من موظفين الحكومه الغير قادرين اطلاقا علي التعامل مع التكنولوجيا الحديثه بيفكروا ويتنفسوا ببيرقراطيه غبيه

يا جدعان ده وانا صغير ابويا كان عاملي دفتر توفير ,,وكاي طفل ظريف كنت كل محوش خمسه جنيه كل ست سنين اروح احطهم في الدفتر كانوا بيطلعوا عين اهلي عشان الخمسه جنيه روح للشباك ده لالالالالا مدام اسمهان في حاله وضع روح للشباك ده لالالالالالا استاذ طلعت في الحمام روح للشباك ده لالالالالالالا انسه سنيه بتفطر

واخيرا دخلوا النظام الكمبوتري الحديث في المصلحه اتفرج يا سيدي

هما هما الخمسه جنيه الي مش عارف احطهم بقالي 10 سنين

روح للجهاز ده لالالالالالالا الجهاز عنده كالوا في الهارد روح للجهاز ده لالالالالالالا اصل البروسيسور متخانق مع الرامات روح للجهاز ده وبعد ما تروح يرد عليك الموظف بكل برود بعد ما يتقطع نفسك لا يابني السيستم واقع!!!!!!!ا

رجب ومياه واشياء من هذا القبيل

بعد ما قررت ابطل اشرب سجاير في الاوضه بتاعتي عشان صدري اتحرق وانا نايم بليل من كتر الدخان

بقيت اطلع اشربها في البلكونه

وانا واقف في عز البرد بردد اغنيه رجب حوووش صحبك عني وبولع سيجاره

لاحظت حاجه غريبه جدا في المدرسه الي قدامنا ,,,لاقيت صوت ميه جامده اوووي قولت يمكن العيال نسيوا والدادات مشيت من غير ما تقفل المحبس , عادي

اليوم الي بعديه نفس الوضع بالاضافه طبعا ان معظم انوار الفصول منوره

وهكذا لحد النهاره يوميا اطلع اغني رجب وولع في سجاير والميه شغاله الله ينور

المشكله انها مدرسه خاصه يعني بتحاسب علي الميه والكهرباء ديه فما بالك بقي بالمدارس الحكومي

اضرب يا معلم كام حنفيه في كام حمام في كام مدرسه في كام محافظه في القطر المصري

وقيس بالتبعيه علي الكهرباء

يا نهار ابيض

وتقولولي الميه بتروح فين

الله يخرب بيوتكم والبيوت الي جنب بيوتكم محدش عارف وهو خارج من المدرسه يقفل محابسها وكهربتها

محدش فكر ان ده حرام وانه هيتحاسب عليه يوم القيامه ,,, بلاش ياعم الحته الدينيه مفكروووش ان ده ممكن يوفرلهم في الفلوس

الي يغيظ ويفقع المراره ان الحكومه كل يومين تفتكر انها لازم توفر الميه عشان اجيال المستقبل تقوم عملالك حمله اعلانيه تكلفها كلم مليون عشان تقول لسنيه وفتحيه اوعوا يناموا غير لما يقفلوا الحنفيه,,وينسوا نفسهم وينسوا مصالحهم ومدارسهم

حسبنا الله ونعم الوكيل قلبي وصوابع رجلي غضبانين عليكم ليوم الدين

الدين لله والوطن لل.......؟

نجحت قوات الأمن المصرية يوم الجمعة فى التصدى لمصادمات جرت بين مسلمين ومسيحيين بقرية (بهما) مركز العياط بمحافظة الجيزة عقب صلاة الجمعة أثر شائعة اعتزام أحد أبناء الطائفة المسيحية إقامة دار عبادة بدون ترخيص.

البلد ديه عندها مشكله كبيره اوووي وبالتبعيه مدام المشكله في البلد يبقي اساس المشكله في اهلها,, المشكله اننا بنبص تحت رجلنا مش قدامنا ,, ممكن يكون في حجات واضحه قدامنا بس احنا مش شايفنا او بمعني اصح مش عايزين نشوفها.

قريتوا الخبر,, 500 شاب امور علي كام راجل ولعوا في تلات بيوت بتاع ناس مسحيين علشان واحد مسيحي كان عايز يبني كنيسه من غير تصريح

الناس ديه هبله ولا بتصتنع الهبل هي المشكله في ان الراجل المسيحي عايز يبني كنيسه ولا المشكله في ان الحكومه مانعه اني الناس تبني كنايس الي بقرار جمهوري او بقرار من المحافظ الي هو برضه بياخد قراره من الرئيس

تعالوا( نفحص الموضوع بالاسلوب العلمي وناقشه بالمنطق ونحلله)هو عدد المسيحين الي الحكومه مش راضيه تعلن عنه لحد النهارده كام!!!!!!! ا

بافتراض ان عدد المسيحين الاحياء داخل القطر المصري بيساوي 10 مليون مسيحي

الناس ديه لو فكرت تعمل كنايس هيعملوا كام كنيسه بالتاكيد مش 10 مليون زيهم ولا حتي مليون بالكتير اوووووي هيعملوا 200,000 كنيسه بواقع ان كل كنيسه في مصر هتخدم 50 فرد وده رقم غير واقعي,,,, ايه باه المشكله اننا نسمح لهم انهم يبنوا كنايس

لسه بنعامل المسيحين في مصر بمبدا الخط الهميوني مين الي ليه مصلحه انه يولع بين المصريين والمصريين

المسلمين بيقولوا ان المسحيين هما الي وكلين البلد ومعاهم فلوس قد كده

احنا الي عملنا كده احنا الي بعدناهم عن الوظائف الحكوميه احنا الي بعدناهم عن القضاء والجيش والشرطه فبلتبعيه هما اتجهوا ناحيه التجاره( وسيدنا محمد عليه الصلاء والسلام كان بيقول في حديث مش فاكر نصه ان تسعه اعشار الرزق في التجاره) يبقي مين الغلطان

انا ليه اصحاب مسحيين كتير كلهم الله اكبر عليهم شغالين شغلانه واتنين وبيتاجروا وبيفكروا وبيكسبوا

ليه نهجامهم ونحسسهم انه مواطنين درجه تانيه في حين ان المصريين كلهم مواطنين درجه عشروميه

اختفي شعار الدين لله والوطن للجميع والكنيسه الي جنب الجامع مبقتش دليل علي الوحد الوطنيه بقت دليل علي مين اكبر من مين ومين ماذنته اعلي من برج مين

ليه مبقاش في سماحه وحب واحترام متبادل

مين ليه مصلحه انه يلهي الناس عن مشاكلهم الحقيقيه

ويخليهم يبصوا علي مشاكل تافهه واقل من انها تشغل عقله

انا عن نفسي عارف ياترى انتوا عارفين؟؟؟؟؟؟؟؟؟؟؟؟؟؟؟؟؟؟

العشره متنهوش

الي كل فتيات الجامعات لا تقدموا علي هذه الخطوات

بالتاكيد معظم البنات في فتره الجامعه اتعرفت بشاب ظريف ضارب شعره جيل علشان يكون شبه تامر حسني او حالق شعره زيرو وعايز يقلد احمد عز(بلاش غباء بالتاكيد مش احمد عز بتاع الحديد والصلب) المهم

الحياه كانت حلو في سنه اولي , لذيذه في سنه تانيه , زباله في تالته ,سبتوا بعض في رابعه.

قصه عاديه جدا حصلت لنص بنات مصر المحروسه

بالتاكيد مش انتي الغلطانه بس في شويه تصرفات اوعي تعمليهم مع الشباب خاصه لو كان الموضوع ارتباط ومفيش حاجه رسمي وهم كالاتي

اوعي تقوليه ماما عايز تقابلك او خالتي او عمتي او حكيت امبارح لخالو عنك ونفسه يشوفك ابعدي خالص عن الحوارات ديه لانه هيحس انك بدبسيه في حاجه رسمي

بلاش التليفونات الكتير صبح وليل وتصحي من النوم ترنيله وانتي نازله واول ما توصلي الجامعه واول ما توصلي المدرج واول ما تقعدي عشان كل انسان وليه قوه تحمل

لو انتي اتعرفتي بشاب من جامعه تانيه او مش معاكي في نفس الكليه بلاش حكايه صحابي هيموتوا ويشوفوك (علي اساس انه مسلسل رمضان) لانه ممكن يتخنق من الكلمه والتصرف, بس ممكن بشياكه تخلي يجيلك الكليه وتعرفيهم علي بعض علشان ميكونش في ترقب من الطرفين.

لو حصل وقدر يقلب من ابوه قرشين وخرجتوا متحدديش انتي المكان ممكن يكون قلب من ابوه 50 جنيه وانتي

بتفكري تروحي سلنتروا

فطبعا هيقولك نفضي لنفسك مفيش غير ماكدونالذ انا هطلب لنفسي صنداي وهجيبلك هابي ميل

بلاش موضوع اعرف فلان ومتعرفش علان ده علشان هيتخنق منك بدري بدري صاحبه ومش هيسيبه نفضي لنفسك

لوالاخ بيشرب سجائر متعمليش مصلحه اجتماعيه وتقوليه بطل , انتي مش وعدتني يا وحيد صحتك يا وحيد , فلوسك يا وحيد والحوار الفاشل ده هو لو عايز يبطل كان بطل

غير كده باذن الله ربنا هيكرمكم وتسيبوا بعض في سنه اولي

عجيبه الدنيا التامنه

باذن الله ابتداء من اول امبارح بليل سوف يتم اضافه شوارع القاهره الكبري الي عجائب الدنيا نظرا لندرتها الشديده في العالم اجمع والخوف عليها من الانقراض وقد صرح السيد المسئول الكبير انه سوف يقام متحف للاحتفال بهذه المناسبه القوميه الجليله (حلوه اوي جليله ديه) وسوف يضم المتحف مجموعه من المركبات التي تسير في شوارع قاهره المعز منها علي سبيل المثال

مجموعه من سيارات الزرفيس المتنوعه والترامكوا منها خاصه مع وضع تماثيل شمعيه لمواطنين داخل تلك المركبات تمثل الطفره المحققه في احتواء تلك المركبات علي ذالك العدد من الافراد

مجموعه من التماثيل لسائقي الميكروباصات بسجائرهم ذات الرائحه النفاثه وكوب الشاي الذي لا يفارق ايديهم

مجموعه تماتيل تمثل تباعي الميكروباصات الذين يصررون دائما علي ان الطرقه فاضيه يا استاذ

مجموعه من الاكصدامات المصنعه عموله عند الاسطي ضلمه والمصنعه من افضل انواع الحديد والصلب بالعالم

تمثال شخصي للاسطي ضلمه

واخيرا سيتم وضع نموذج حقيقي لسياره قرر سائقها دخول الشارع الاول قبل الميكروباز

ملحوظه

العزاء علي روح السائق بمسجد النور والامل بنهايه الطريق الصحرواي

موجه حر

بمناسبه موجه الحر الي فاتت ديه لاحظت انتشار باديهات وهاف استومك كتير اوووي كانهم ماصدقوا

مصر مبارك

احنا اجدع شعوب الارض في اننا نحول رؤسائنا الي الهه تتحرك علي الارض

محدش يقدر يتحرك غير بتوجيهاته ولفتاته الطيبه وارشاداته الساميه . لازم الرئيس هو الي يامر وهو الي يوجه ولازم لما تحصل مشكله نطلب من سيادته انه يتدخل

ازاي نحصر بلد فيها 70 مليون بني ادم في شخص واحد

وابسط مثال علي ده موضوع القاضي الي سافر يتعالج بره .. الدنيا اتشالت واتحطت والقضاء طلبوا من الوزير انه يعالج زميلهم والوزير يرفض وحوارات ومره واحد يا معلم الرئيس يتفضل ويامربمعالجه القاضي علي نفقه الدوله مهوا بالعقل يا جدعان لو القرار ده من الاول صح الوزير موافقش عليه ليه ولو القرارغلط ازاي الرئيس يسمح بيه

ونفس الموضوع في التعديلات الدستوريه الرئيس هو الي طلب من مجلس الشعب انه يعدلها

وموضوع الولد الي بوكس الكهرباء قطعله دراعه الرئيس برضه هو الي امر انهم يعالجوا الموضوع ده .

يا نهار ابيض وزاره كامله فيها موظفين وعمال ومهندسين ومديرين مقدروش يفكروا انهم يعالجوا موضوع البوكسات المفتوحه غير لما

الرئيس يقولهم ........ والله ديه مهزله

الانكت بقي موضوع"طبقا لتوجيهات سياده الرئيس"انا كل ما اسمع الكلمه ديه اضحك يعني هو الوزير او المسئول ده معندوش عقل مش بيفكر افرض يا عم ان توجيهات سياده الرئيس غلط افرض انك هتعمل حاجه تانيه صح مع توجيهات سيادته برضه افرض اي حاجه متحصرش مجهود ناس كتير اوووي في توجيهات سياده الرئيس.

واخيرا "طبقا لتوجيهات الشعب المصري"مصر مش مبارك

مظاهره عين شمس

اذا كنت من سكان مناطق عين شمس ,المطريه,النعام,الف مسكن,مصر الجديده فانت بالتاكيد لن تنسي اليوم الي فرقعت في ماسوره الميه الرئيسيه الي بتغذي المناطق ديه الي هي اساسا جاي من السواح
لو كنت من مناطق النزهه ومصر الجديده فانت هتصحي الصبح وتضرب الحته الي علي الحبل وتنزل بكل الاطه تشتريلك ميه معدنيه ده لو لقيت لان من امبارح الناس كانت بتخطف الازايز من علي العربيات بفرق نص جنيه او اكتر في الازازه .. انما بقي يا باشا لو انت من عين شمس خاصه المناطق التي تطل علي جسر السويس ونادي الشمس فحدث بلا اي حرج ان الناس كانت عامله مظاهره اه والله مظاهره
. انا كنت راكب الميكروباص رايح النزهه وفجاء الطريق وقف ,,عادي جسر السويس ممكن في اي لحظه يوقف انما المصيبه الي انا شوفتها هي سور نادي الشمس وبوابته الرئيسيه مئات الافراد والعائلات والعيال الصغيره كل واحد ماسك في ايديه جركن ميه او حله او حته كام ازازه فاضيه وامم علي السور و العيال الصغيره اهليهم تنططهم من علي السور والعيال تدخل تملي الميه وتحدفها لاهليهم تاني
يا نهار ابيض ايه ده ديه مصيبه يا جدعان الكلام ممكن يحصل في الصين في الهند في اي بلد غير بلدنا انتوا عمركم ما هتتخيلوا المنظر غير لما تشوفه بعنيك فضيحه فضيحه بكل المقاييس حتي الميه,, امال لو حصلت ازمه في القمح ايه الي ممكن يحصل الناس هتموت من الجوع. مين المسئول عن وجود مواسير مياه رئيسيه بقالها اكتر من 50 سنه مين المسئول عن صيانتها ونضافتها وغسيلها واكلها وشربها مين الي هيدخلها تنام بليل مين الي ممكن نحاسبه علي المهزله ديه ...هو بالتاكيد مش ذنبه انها فرقعت انما ذنبها انو سابها مهمله لحد ما فرقعت
قيس بقي يا معلم علي الاساس ده حال مصر كلها وقال جمال مبارك عايز يعمل نووي في مصر دحنا لو عملنا نووي في مصر هناثر علي غابات الامازون بالاشعاع هتلاقي العامل نسي يفتح الحنفيه الي بتسقع المفاعل

وعشر دقائق وتلاقي مصر عليه سحابه نوويه (بنت اخت السحابه السوداء) عقبال الماسوره الي في شارع العروبه.

الصيف وصل

كل سنه وانتم طيبين الصيف وصل انا موصليش الخبر غير امبارح وانا قاعد بتفرج علي بوسي سمير وهي بتحط النقط علي الحروف وفجاء اختفت الشاشه والمروحه وقفت وعلي الرغم من قدرات الست بوسي المتعدده غير انها ملهاش ذنب ده "النور قطع"

احنا البلد الوحيده في العالم الي كل مشاكلها واحده وكل اسباب مشاكلها معروفه وعلي الرغم من كده مش بنعرف نحل المشاكل ديه كل سنه الصيف يهل علينا وتسود الدنيا علينا والسبب الضغط علي شبكه الكهرباء.

طب مدام الحكومه عارفه ان الصيف لما بيهل علينا الكهرباء بتقطع ليه مبتعملش حسابها وتجيب الشيخ مرسي يقري المعوذتين علي كام محطه من محطات الكهرباء وتدبح كتكوت يتيم وتدفن ركبه نمله جنب كل بوكس.

فين الملايين الي عماله تتصرف علي تحسين البنيه التحتيه والفوقيه والجنبيه والدقهليه فين وزاره الكهرباء فين النووي الي عايزين يعملوه عشان الطاقه فين العمال والمهندسين والعربيات والكبلات كل ده بيختفي مع الضلمه.

الي يغيظ ويفقع المراره انك لما تكلمهم يرد عليك موظف ظريف قرفان منك لانك فكرت تقلق راحته وتنبهه ان في كام حي من احياء القاهره من غير كهرباء يرد عليك في قرف واضح اصل احنا بنعمل اصلاحات ولو راجل بقي اساله هتخلص امتي الاصلاحات ديه هتحس انه عايز يقفل السكه في ووشك ومش بعيد يلف السلك حولين رقبتك ويرميك من الدور العاشر هيسكت شويه ويرد في نفاذ صبر يعني ساعتين كده باذن الله وتيجي سلام عليكوا تريييك يقفل السماعه ابلع الاهانه احسن ما تكلمه تاني علشان مش هيرد.

اجمل ما في الموضوع ان الكهرباء لما بترجع تفرقعلها كام لمضه لو بنت حلال ولو مش حلال اووي هتضرب التلاجه والتلفزيون وتقعد بقي اسبوعين يا معلم من غير ميه ساقعه ومن غير بوسي سمير

حسبي الله ونعم الوكيل انا مش زعلان عشان الميه انا زعلان عشان بوسي.