انا مش معاهم: سبتمبر 2007

الجمعة، سبتمبر ٢٨، ٢٠٠٧

ثورة

الناس بدات تفوق

الناس بدات تفكر

الجوع قرصهم

والفقر تعبهم

والمرض نهش جتتهم

خلاص بقي

هنبقي علي ايه تاني

عيال : مبقوش عيال كبروا بدري وماتوا بدري واندفنوا بالحياة

صحه : راحت من الاكل الهباب والميه الطين

فلوس : لو كان معانا مكناش طهقنا

كرامه : دايسين عليه بالجزم

خلاص بقي مش قادرين نتسحمل

مش قادرين نستحمل ظلم

مش قادرين نستحمل فقر

مش قادرين نستحمل جهل

الي بيحصل النهارده في المحله ممكن ينتهي, ممكن يموت, ممكن يصرفولهم قرشين وخلاص

بس بكره هيكون في الف الف عامل بيطالبوا بحقهم

هيكون في مدرسين وطلبه مهندسين ومحامين

هيبقي في خمسه وسبعين مليون مصري بيطالبوا بحقهم

الخميس، سبتمبر ٢٧، ٢٠٠٧

خربــــــــــــــــــــــــــــــــــــــــانه

خمس رؤساء تحرير واتنين صحفيين هيتحبسوا

اعتصامات واضراب في المحله

البلد كلها تقف عشان الرئيس بيسلم عشرين شقه في اكتوبر

ناس بتتعذب ليل نهار في الاقسام ومحدش عرفلها صاحب

ناس بتعذب ليل نهار في الاقسام ومحدش بيحاسبها

اكل بايظ , مبيدات مسرطنه , هواء ملوث , مية معكره

تعليم متخلف , شوارع مكسره , مستشفيات ضايعه

طب انا راضي ذمتكم

خربانه ولا مش خربانه

الأربعاء، سبتمبر ٢٦، ٢٠٠٧

اتمنى اشوفك عندي

انا مبحبش الكلمتين دول

(اتمنى اشوفك عندي, اتمنى اشوفك فى مدونتي, تعالي زورني )

هستناك

ده الكلام ده علي اساس انك ابت خالتي الي مقبلتوش من سبعين سنه

عايز تعلق اتهبب علق ومتكتبهاش

مش عايز براحتك

بس مش كل ماادخل مدونه الاقي واحد سايب تعليق

وفي الاخر يكتبلك الكلمه المشهوره

اتمنى اشوفك عندي

الجمعة، سبتمبر ٢١، ٢٠٠٧

نجاح متصل

أن انخفاض اسعار المخدرات المطروحه في سوق تجارة التجزئه

يعني ببساطه نجاح متصل باقل قدرا من المخاطره في عمليات التهريب

ولاول مرة منذ عملي في التجارة لا يتجاوز حجم المضبوط 3% من حجم المستورد

احمد ذكي

ارض الخوف

اقتباس يصف من وجهه نظري انتشار المخدرات الشديد الذي يحدث في المجتمع المصري الان

الثلاثاء، سبتمبر ١٨، ٢٠٠٧

سبع رجاله

محمد جمعة " 41 عاما" ، نجله أيمن " 17 عاما" ، عبد الشافى على " 30 عاما" ، وشقيقه حسن " 33 عاما" ، فتحى عبد الحفيظ " 38 عاما" ، شقيقه جمال " 34 عاما" وأحمد محمد " 22 عاما".

الناس الغلابه دول ماتوا وهما بيحاول ينقذوا بعضيهم في بلاعة صرف صحي

محافظ أسيوط صرف 5 آلاف جنيه لأسرة كل متوفى

علي كده الواحد لو حويش سبع تلاف جنيه يشتريله راجل ونص

الاثنين، سبتمبر ١٧، ٢٠٠٧

مصريون ضد التعذيب

مهمتنا اننا نحاول نوقف التعذيب الي بيحصل

من اول الضرب علي القفا

لحد الكهرباء والحرق بعقاب السجائير

نحاول نمنعهم عشان الدور ميجيش علينا

الي يحب يشارك يدخل مدونه

جبهه التهيس الشعبيه

عشان يعرف التفاصيل

لو مش عايز كفايه تنشر الصور ديه في مدونتك

الأربعاء، سبتمبر ١٢، ٢٠٠٧

مليون دولار350

المستثمرين الاجانب سحبوا 350 مليون دولار من مصر

لما نزلوا الصبح واشتري جورنال الدستور بجنيه

وقرواء الكلام الي فيه عن الرئيس

البلد الي يتسحب منها 350 مليون دولار عشان اشاعه لمرض رئيس او حتي موته

لازم كل مسئول فيها يتحاكم

دول لازم يتحاكموا بتهمه الغباء السياسي عشان توجيهه تهمه زي ديه تهمه للنظام قبل ما تكون تهمه للاستاذ ابراهيم

كل سنه وانتوا طيبين

الأحد، سبتمبر ٠٩، ٢٠٠٧

اخير اعترفت الحكومه بوجود حالات تحرش بمصر ده بعد ما نص مصر تم التحرش بيها ...لو سمحت متضحكش لسه الضحك بعدين

الي يضحك مش ان هي أعترفت بعد موضوع وسط البلد بحوالي 9 شهور لا الي يضحك هي اسباب التحرش الي اللواء احمد ضياء الدين مساعد وزير الدخليه للشئون القانونيه قالها امام مجلس الشعب
نضف ودنك واسمع الكلام يمكن تستفيد

القنوات الفضائيه وما تذيعه من مشاهد توجج المشاعر(حلو توجج ديه) ,المواقع الاباحيه , البلتوث , الجيل التالت من شبكات المحمول

امنع الضحك عيب تضحك علي كلام الراجل , انا بقول امنع الضحك
الرد ده فكرني بقصه الراجل الي دخل علي مراته لاقها قاعده مع واحد علي الكنبه قام بايع الكنبه

بقي هي ديه اسباب التحرش في مصر . امال البطاله والتخلف والمخدرات تبقي ايه .اختفاء الخطاب الديني و قله فرص العمل وارتفاع نسبه العنوسه بين الولاد والبنات تبقي ايه(9ملايين شابه فوق 28 سنه بدون زاوج و5 ملايين شاب زيهم) طبقا للمجلس القومي للاحصاء
ارتفاع اسعار السلع الضروريه وارتفاع اسعار الاسمنت والحديد والشقق عموما تبقي ايه

نصيحه لكل شاب انه يبعد عن البلوتوث لانه بيسبب حاله هوس واضحه تجاه الجنس الاخر ولو قررت تشترليلك خط اتصالات يبقي انت الي جبته لنفسك هينتهي بيك الحال في قسم الشرطه ويدبسولك الموبيل في القميص

ممكن تضحكوا دلوقتي انتهي البيان

نشرت بتاريخ 10/مايو/2007

انا اعدت نشر هذا الموضوع عشان شوفت امبارح حالات تحرش