البوكسر باين يا كابتن

البوست ده من الارشيف كتبته في بداية افتتاح المدونة

انا اتكلمت كتير اوي عن حجات بتحصل بمناسبه اقتراب الصيف زي البنات والكهرباء بس النهارده هتكلم عن شباب بلدنا

او بمعني ادق شريحه كبيره من شباب بلدنا الامامير

ايام ما كنت في الجامعه كنت بروح زي اي طالب محترم كل سنه يعرف عليه كام علي اساس اني مدفعتش مصاريفي خلال تلات سنين فاتوا

الي يعرف كليه تجاره جامعه عين شمس يعرف ان شبابيك شؤون الطلابه نازله لتحت شويه علي اساس انهم يكسروا عين الطالب ويخلوه ينزل بجسمه عشان يعرف يكلم الموظف

انا واقف في طابور طويل عريض وقدامي شابين ظراف جدا وجنبينا بنات واقفه في صف تاني

المهم الدور جيه علي الولد الي قدامي

الامور لابس بنطلون ساقط ونص البوكسر باين

شويه وقام رايح للشباك علشان يكلم الراجل

وهوب قامت حاصله المعجزه نص ضهره بان مع جزء صغيره من الموخره

طبعا البنات اتكسفت وانا كنت هرجع عليه

قرفت من الموقف قمت مقرب منه وبصوت واطي قولتله البوكسر باين يا كابتن

لا تتخيلوا حقاره النظره الي كان بيبصهالي نظره بطول وعرض ويمين شمال كانوه عايز يسفخني بالقلم علي وشي ولما لاقني عريض حبتين وطويل سبع حبات قام مغير قراره وبص ناحيه الموظف

اتنرفزت انا بقي وبعز ما ربنا اداني من صوت قمت قايله

البوووكسر بتاعك باين يا كابتن

طبعا نص البنات اترميت علي الارض من كتر الضحك وصاحبه قعد يضحك عليه

مفيش ثانيتين وقام رافع بنطلونه الي هو واقع خلقه

بذمتك مش عيب شاب محترم كده يمشي قدام الناس والبوكسر بتاعه باين

المشكله انهم بيلبسوا عليه تيشرتات اميركان وباديهات قصيره يعني لو فكر انه يجيب حاجه وقعت منه نص القاهره الكبري هتتفرج عليه