احنا الجيل الصاعد
احنا الجيل الصاعد احنا الجيل
نشيد كنا بنغنيه في المدرسه كان بيصحي اي حد في نطاق تسعميت ميل
اه لو كنا نعرف
احنا جيل ماما نجوي وبقلظ وماما عفاف الهلاوي
احنا جيل مازنجر وافردويت وكابتن ماجد كل يوم علي القناة التالته الساعه عشره
احنا الجيل بتاع فجر الاسلام في المولد والرصاصه لاتزال يوم سته اكتوبر
احنا جيل حرب الخليج الاولي والتانيه والتالته
احنا الجيل الي اتضحك عليه وهو صغير
واضرب علي قفاه وهو كبير
احنا الجيل الي ضيع مصروفه علي الكولا عشان العجله
احنا الي خرجنا من اعدادي كلنا بنقول هندسه وطب
احنا الجيل الي قالك ياشرطه يا حربيه وسقطنا في الاتنين
وخرجنا من ثانوي علي تجاره وحقوق ومعهد خدمه اجتماعيه
وخرجنا من الكليه علي قهوه السمسميه عدل
احنا الجيل الي قاطع البودره
واحنابرضه الجيل الي حب البانجو وعشق الحشيش
احنا جيل علي حميده وهشام عباس وسيمون
احنا جيل عمرو ومنير
احنا الجيل الي ستين في الميه منه عنده اكتئاب
احنا الجيل الي شرب مية مسممه وفاكهه مسرطنه واكل مليان مبيدات
احنا الي خرجنا في مظاهره فلسطين والعراق وسوريا ولبنان
واحنا الي اهلينا اتضحك عليهم في الريان
احنا جيل همام والسقا وعلاء
جيل اللمبي والحركات
وبطالنا نشيل محافظ!!!!!!!عشان معندناش جيوب وراء
احنا شباب تعبان
وبنات حيرانه
مش عارفين نحب
مش عارفين نتحب
مش عارفين نعمل اي حاجه
غير اننا نتكلم
ونكتب في بلوجتنا
عن احلامنا
عن طموحتنا
عن الي كان ممكن نعمله
لو مكناش من هذا الجيل
احنا شباب الجيل الصاعد احنا الجيل
تحت بند
تخاريف
هناك ١٣ تعليقًا:
هييية ها الحق اعلق اول واحدة ، احمدك يارب،
اولا: حمدلله على سلامتك وانهائك للمقاطعة، صحيح حالة الاكتئاب مازلت مستمرة و اصبحت الان تنتشر و تتوغل، لكن ان شاء الله تعدى على خير،
طبعا بما نى تقريبا بانتمى للجيل ده احب اقولك انى مع انى ما بشربش كوكا كولا كتير الا انى و الحمد لله كسبت العجلة من اول 3 زجاجات جبناهم، صحيح اضطريت ابعها بسعر قليل على شان احنا لا نقدر الرياضة مثل شرب السجاير و لو كنت فكرت اروح بها كليتى او شغلى كنت زمانى فى الخانكة، لكن فى امل ، طولت عليك ، لكن حمدلله على السلامة
صحيح احنا الجيل الصاعد ده
وعشنا كل اللى انت قلت عليه
لكن احنا جيل لسه عندنا أمل
وعندنا إيمان بأن ربنا مش نسينا
وعندنا ثقه بان بكره ان شاء الله احسن
مبروك عل عودتك وميرسى اوى على شكرك لينا
بس احنا مش عايزين شكر
احنا عايزين انك تتفائل
وعلى رأى فريد الاطرش
"الحياة حلوة بس نفهمها....الحياة حلوة محلى انغامها"
60% بس
اللى عنهم اكتئاب اعتقد اكتر من كده
احنا جيل عنده حالة ملل وزهق واكتئاب وكآبة واحباط مستمرة واهم حاجة ان احنا مش بنعرف نقرر اى حاجة فى حياتنا
وانا انسانة مكتئبة جداجداجدا
يااااااااااه
صدقت في كل كلمة بجد
احنا الجيل ده فعلا ...اللى كان بيتفرج على القناة الأولى و حاسس ان تليفزيونا المصري و بلدنا دي أحسن بلد في الدنيا و شعبنا و حكومتنا ناس ذوق ذوق ذوق ....و فجأة لما جيبنا الدش اكتشفنا الحقيقة المرة
احنا الجيل اللى كان بيمشي جنب الحيطة لغاية ما الحيطة وقعت على نفوخه
احنا الجيل اللى بقى عنده ستين سنة من قبل ما يتم العشرين ....و اتفرج علينا و احنا ماشيين في الشارع هتعرف كلامي
نصحى الصبح عندنا أمل و نرجع باليل كارهين حياتنا لكن قبل ما ننام نقول لنفسنا أكيد بكرة هيتحقق الحلم..
مش عارفة بس يمكن نكون احنا الجيل الانتقالى ....]مكن نكون احنا مرحلة علشان بلادنا تبقى أحسن ....و يكون الأمل في الجيل الصغير لكن احنا اللى هنربيهم فلازم نتحمل كل ده
ما هو احنا بردو لازم يكون عندنا أمل علشان ما نموتش بحسرتنا ...و لا إيه؟؟؟؟؟؟
تحياتي
أهو ده الكلام
لازم نكتب عن أحلامنا اللي ضاعت مننا يمكن لما نكتب عنها نلاقيها تاني يامحمود
ماتعملهاش تاني
ربنا هيهون الأيام ويعديها علي خير ان شاء الله وبكره هيبقي أحسن باذن الله
تحياتي
حمدلله ع السلامه ياريس وربنا ماحد واخد منها حاجة روق ياكبير ههههههه
فى حاجة انت نسيتها ان احنا الجيل الى متمسك بدينه فى ظروف الهجوم ع الاسلام اشد من الجمر والفتاوى بقيت عمال ع بطال لكل من هب ودب وان الى يعبد ربنا حق عبادته فى الزمن ده ثوابه اكتر بكتييييييييير من ناس بيعبدو ربنا من غير مايبقا فى حرب حواليهم على دينهم
وكمان احنا جيل الى حد ما واعى وكل حاجة بقينا بنعرفها مفيس حاجة بقت بتستخبى وقادرين نتكلم ونواجه حتى لو النتيجة مظهرتش دلوقتى هتظهر بعدين نتيجة لكفاحنا ده
الحمد لله والف الف مبروك ان الاكتاب راح
هو الظاهر كان فى حاجه فى الجو
يارب دائما تفضل فى سعاده
ويبعد عنك شر الاكتاب
جيل صاعد
مش صاعد
اهم من كل دا
ان انت رجعت
ارجع وقول
قول كل اللي جوالك
المهم تتواجد بينا وتقول
هاتعمل ايه في وحدتك واعتكافك
مش انت واحد من الجيل دا
الجيل الصاعد
من حقنا عليك
تفضل معانا
احنا بنقوي بعض يا محمود
ولما انت تعتكف
مين بقى
ياخد
لقب الثائر على الاوضاع
عودا حميدا
يا حودة
اروح بقى اعزم نفسي على
شاي حلاوة
رجوعك
كووول يامان...
بس انت مش معايا برضه ان فكرة البوست ده مش جديدة؟؟؟ وانا وانت عارفين هيا بتاعة مين؟؟؟
ولا ممكن يكون فعلا الوحى جالك زيه... بس شاكك فى كده على العموم صباحك موز بلبن... اوعى تزعل
الف حمد وشكر على رجوعك للكتابه
واللهى انا سعيده من قلبى
وان شاء الله الباقى من الحزن
يحل محله المل والفرح
ده نتيجه احساسك المرهف ووطنيتك
ى فى جيلك ناس رائعه بس
مش واخده حقها السبب معروف
بس دوام الحال من المحال
صدقنى ان شاء الله فى امل
البدايه هى الرفض والانتقاد
ولما تظهر ست زى نهى الزينى
وهشام البسطويسى
وابراهيم عيسى ووائل الابراشى
وعصام العريان وغيرهم كتير
اكيد فى امل
ودينا بيحثنا على الأمل وفى الثقه
فى الله اسمه العدل
وان مع العسر يسر
احنا فى ايام مفترجه
ادعو وصلى الفرج ات ات
كل سنه وانت طيب
وربنا يفرجها عليك وعلينا كلنا
اسعدتنى بكتابتك
لعب عيال
---------
العجله من اول تلات مرات
يا بختك
انا ضيعت شقي ابويا علشان العجله وممجبتهاش برضه
شمعه امل
--------
بالتاكلد الحياه حلوه
طول ما فيها ناس كويسه وشباب وبنات زي الورد
زيك كده
ياسمين
-----
كفايه ستين
والباقي يارب يغيروا حاجه
سلامتك من الاكتئاب
الحلم العربي
----------
لازم يكون في امل
امل وسعاد وعمرو وحسين
بس اهم حاجه انهم يغيروا الوضع الي احنا فيه
فنـــــــــــــان
--------------------
مش هعملها تاني
ومش هسيب حلم غير لما اكتب عنه
هوندا
------
لازم نمتسك بدينا يا هوندا
ونتمسك بيه صح
مش مجرد لبس وشعارات
بالتاكيد احنا جيل ووواعي
بس تفتكري بنستخدم وعينا ده في ايه
سمسم
----
تقريبا كان حاجه في الجو
ويارب انتي كمان
ما علينا
----------
لو انا لقبي الثائر
يبقي انتي
لقبك ايه
انتي بتخلينا نشوف حجات مش شيفنها
مرسيه دائما علي ردودك الي بترفع روحي المعنويه
اشربي شاي زي ما انتي عايزه
والحساب عندي
بس كوبايه واحده كفايه
همبكه
-----
للاسف انا مش عارف انت تقصد ايه
يريت توضح كلامك
كلمات
------
طول ما في ناس كوويسه في الدنيا زيك
لازم الدنيا تكون كويسه
ومعاكي
ومع كل الناس الي انتي قولتي عليهم
باذن الله هنتغير
مش عارف بقى امتى هنبطل كلام و خطب و شعارات و نبدأ نشتغل
و لا صحيح
هنعمل ايه يعنى
ادينا مستنيين
يا رب
مفيش غيرك اللى عارف اللى فينا
اتمنى اشوفك فى مدونتى
" احنا الجيل اللى انضحك عليه وهوا صغير , وتنضرب على قفاه وهوا كبير "
جامدة
بس تفتكر دى غلطة مين ؟؟
غلطتنا احنا ؟؟ ولا غلطة الأجيال اللى فاتت ؟
إرسال تعليق