سي السيد احمد عبد الجواد
مفيش راجل فيكي يا مصر لما بيشوف الست امينه وهي بتجري وراء سي السيد وبتقوله
من شر حاسد اذا حسد ومن شر النفاثات في العقد
غير لما بينشكح ويتخيل نفسه سي السيد
ويبص لمراته بصه طويله ويلعن اليوم الي راح فيه صالون بيتهم وطلب ايديها
بغض النظر عن سلوكيات السيد احمد عبد الجواد المشينه
وبغض النظر برضه عن شخصيه امينه الخنوعه المستسلمه
في نقطه عجباني اوووي في الموضوع ده
نظريه الراجل والست
هو ربنا خلقنا مختلفين ليه
ليه خلق الراجل اقوي من الست
ليه خلق الست اضعف وارق من الراجل
ليه ربنا فضل الرجل علي المراة وخلاه هو الي يمسك زمام البيت ويتحكم فيه
علشان نقدر نتعايش مع بعض ,, مش نحارب بعض
علشان الراجل القوي لما يرجع البيت يلاقي الست الضعيفه مستنياه وموفراله كل سبل الراحه
مش المفروض ان الراجل يستعبد الست
وكمان مش المفروض ان الست تعمل راسها براس الراجل
لو فكرتوا شويه في حكمه ربنا في خلقه
هتلاقوا حجات كتير اوووي بنعملها غلط مش من المفروض نعملها
ردا علي مقال تمر حنه الشردوحه ست جيرانها
تحت بند
الحب وسنينه
هناك ١١ تعليقًا:
محمود
هاعلق على الموضوع دا مؤقتا
لحد ما افضالك واروق لك دماغي
حاكم انت مواضيعك نارية
محتاجة دماغ مترتبة
وانا معاك طبعا
في ان شخصية سي السيد برغم ما فيها
من بلاوي
الا انه يعتبر فيه كتير من صفات الرجولة المفقودة هذه الايام
لكن شخصية امينة
كانت فظيعة وقمة الرضا والخضوع للذل
تجسيد حي الاحساس بالدونية
صحيح اتفقنا ان مفيش مساواة
لكن قوامة الرجل على المرأة ليست قوامة تشريف ولكنها قوامة تكليف
الجل قوام على المرأة لانه مكلف بها
وهذا تعزيز وتكريم للمراة
ان يتولى الرجل امورها
وعلى فكرة المرأة قديما كانت تتسم بقوة الشخصية ورجاحة العقل
لذلك كانت تستطيع بكل سهولة
ان تحتوي زوجها وبيتها
المرأة قديما كانت
هي صاحبة الراي والمشورة
ولكن دون ان يظهر هذا
كانت دائما تحرص على ان تمنح زوجها
احساسه بهيمنته وسيطرته
هذا ما كان يسمى بذكاء المرأة
ورجاحة عقلها
وليست العبرة في ضعفها ورقتها فقط
اما اليوم فالنساء قليلات العقل مفتقدات للذكاء في التعامل
طالما مارد المساواة مسيطر عليهن
فوق كل هذا وذاك
ضعف شخصية الرجل
والتي هي الاساس
الرجل الذي يرضى ويخضع
عارفة اني طولت اوي يا محمود
بس هاعملك ايه
انت بقى محسسني ان البيت بيتي
سلام ايها الثائر على الاوضاع
متفقة جدا معاك في ان الراجل الراجل والست ست
بس اعذرني في كلمة ماعجبتنيش انت بتقول ربنا فضل الراجل علي المرأة
بصرف النظر انت ممكن كنت تكون تقصد معني آخر
لكن الكلمة في حد ذاتها استفزتني
الله فضل الرجل علي المرأة (وده اللي بنسميه القوامة)
بما أنفقوا
ودي حاجة تانية خالص
متفقة جدا معاك ان الرجل الأقوي جسمانيا وهو اللي المفروض يتحمل
أعباء الحية مع اني مش موافقة علي مثال سي السيد ده لأنه فيلم بيجسد شخصية الرجل المريضة المسيطرة علي امرأة مريضة بمرض الخضوع والاستسلام
مابنقولش تعمل راسها براسه ولا بنقول هو يستعبدها
لا بقول انه يفهم انها انسان زيها زيه يمتلك عقلا يفكر ومن الممكن انه يتفوق عليه في التفكير أيضا
بل وده اللي بيقولوا عليه ذكاء المرأة وسعة حيلتها
باطالب بس انه يعاملها بالتفاهم والمودة والرحمة
وبعدين انت ماحرمتش من المرة اللي فاتت؟
مصر تطرح المواضيع دي؟
:))
تحياتي
بالمناسبة أنا قريت بوست تمر حنة
وعندها حق
:P
مين اللي قال لك ان ربنا فضل الراجل على الست؟
هي القوامة معناها ايه يا اخي العزيز؟
معناها القيام على الخدمة
وده مش لان الراجل مفضل على الست
بس لان الست عليها مسئولية تصنيع بني ادمين
وهو واجب عليه القيام عليها يعني خدمتها عشان تتفرغ هي للمسئولية دي
بس الكلام ده ايام ما كان فيه رجالة
مش السيد احمد عبد الجواد طبعا
لانه ما بيعرفش يقوم على الست اللي متجوزها
القوامة مش مصروف البيت
ولو ان الرجالة كمان ما بقوش يدفعوا مصروف البيت
لكن القوامة مش بس كده
القوامة يعني الرعاية النفسية والمادية والمعنوية
عشان الست تبقى في حالة نفسية وصحية والمعنوية ومادية كويسة تخليها تعرف تربي ولادها كويس من غير ما تفش غلها فيهم وتنزل فيهم ضرب زي ما بنشوف دلوقت
والسيد احمد عبد الجواد راجل لا عنده انسانية ولا اخلاق ولا قوام اساسا
لان القوامة مشروطة بالانفاق والافضلية
والافضلية مش تقرير حال
الافضلية هنا في الاية شرط
يعني عشان راجل يصلح للقوامة لازم يكون بينفق ويكون افضل
والافضلية في الاسلام بالتقوى
التقوى وبس
يعني المفروض انه مثلا يبقى اعلم منها بالدين لانه مسئول عن رعايتها
والسيد احمد عبد الجواد ما عندوش دين
ثانيا كان بيسرقها
لما يصرف فلوسه على الرقاصات والخمرة وفلوسه دي هو ملزوم يصرفها على مراته وبيته وولاده
يبقى كده بيسرقهم لان ده حقهم
الراجل لما بيصرف على بيته ما بيتفضلش على مراته
ده واجبه
واي تبديد لامواله هو سرقة لمراته وعياله
يبقى فين الرجولة
في القوامة المعنوية؟
لما حابسها وبيسيء معاملتها وقاسي عليها
ويخليها تقف وهو بياكل وتاكل فتات اكله
وهو الراجل وهي الست
يعني المفروض بما انه اقوى بدنيا
انه يقدمها عليه في الاكل
لانها بتولد وبترضع ومحتاجة للغذا اكتر منه
فيه الرعاية الصحية وهو بيسيب لها فتات الاكل
فين الرعاية النفسية وهو بيجرح مشاعرها ويطردها من البيت عشان غلطة
فين الرعاية المعنوية وهي ما بتسمعش منه كلمة حلوة
ومعيشها معاه بالرعب منه
يبقى ده قوام ازاي؟
وللا عنده اخلاق ازاي؟
وللا فيه ذرة رجولة ازاي؟
هي الدنيا اتشلقبت وللا ايه؟
انت ما سمعتش عن سيدنا عمر اللي كان بيتحمل زوجته اللي كانت بتزعق له وسط الناس لمجرد انه هو كان فقير ولا يملك انه يوفر لها كل سبل الراحة
فكان في المقابل بيتحمهلها
وللا انت مش عارف الحكاية دي
هو ده اللي عنده رجولة بجد
مش الصايع اللي اسمه سي السيد
ثم ان سي السيد ده اب فاشل
ومثل سيء للولاده
هو سيدنا محمد صلى الله عليه وسلم كان بيخوف السيدة عائشة وبيشخط فيها او بيعاملها زي السيد احمد عبد الجواد
دي لما دلقت الاكل ع الارض لم الاكل بايده
ولما زعقت وصوتها جاب ابوها من برة
ما ردش عليها
ولما ابوها ضربها الرسول زعل منه
مين بقى اللي فيه رجولة اكتر
السيد احمد عبد الجواد
وللا سيدنا محمد
اه موضوع تعمل راسها براسه ده
انت ضحكتني على فكرة
هو انت فاكر الزوج ده مدير الامن؟؟؟؟؟؟؟؟؟؟؟
انا باشوف ستات اذكى وافهم واجدع واحسن من اجوازهم وكتر خيراه انها راضية انه يعمل راسه براسها
سؤال بس
هو مين افضل
امرأة فرعون
وللا فرعون؟
محمود
خاف على نفسك
حاسة كدا الدكتورة
ماسكة المشارط
وداخلة مباشرة
على مخك
ناوية تظبط لك فيه شوية
ربنا معاك
مدونتك ظريفة
مودك جميل......معارض بس مش مع جماعة معينة....لا اخوان ولا ليبراليين ولا هبل......مصرى مصرى يعني
عجبتني مدونتك وان شاء الله احاول اواظب على زيارتك
والسلام
جميله
يسترك يا بنتي دنيا واخره
انتي الي فهماني
يخليكي ليه
فنان فقير
فرحانه اوووي وعملالي مظاهر في مدونه ايوه خدامه
وتعيش تمر حنه ها تعيش
وداخله في شمال
الي يغيظ بقي ويفقع المراره
انك هاجمتيني ورديتي علي نفسك
بصرف النظر انك تكون بتقصد معني تاني
ماانا فعلا بقصد معني تاني
حسبنا الله ونعم الوكيل
منه له
ليه بس كده يا حودة .. انت اللى جبته لنفسك و ولعت البلوج بتاعك بكيفك و اختيارك:
مين اللى قال ان الراجل أقوى من الست؟ تابع كده يوم من عمر الست المصرية و بعدين نبقى نتكلم
ثانيا: الراجل ليسوا أفضل من المرأة بل المفروض قوامون عليها و تحت سيركومستانسيس معينة فقط
و لما يرجع الراجل القوى البيت يلاقى الخادمة المطيعة فقط هى اللى منتظراه و موفرة له سبل الراحة و لكن زوجته فهى الأنسانة و الصديقة و الحبيبة و العشيقة التى يجب أن يسعى هو اليها ليتنعم برفقتها
و يعنى ايه بقى راس براس؟ و ليه مش المفروض انهم راسهم تبقى فى مستوى واحد؟
و النبى شوبة نصايح للرجالة ياحودة
تمر حنه
انا كتبت بوست عن المساواة
قولت الي انتي بتقوليه ده
وموضوع راس براس الي ولع الدنيا ومطفهاش
انا اقصد ان الست متخرجش من رقتها وجمالها علشان تتساوي مع الراجل في امووور متعبه لانوثتها
ولصحتها
غير كده
هما بالتاكيد متساوووين
و كلامك أحلى كلام يا حوده.. ,وصل و كفاية علينا
بص لو عايز تبطل سجاير ..بلاش العسلية لأن ادمانها أصعب مالسجاير
و اشرب ميه كتير بتساعد
ربنا معاك
إرسال تعليق