انا تعبت

صحيت النهارده من النوم تعبان

صدري بيشخلل

وجيوبي الانفيه اعلنت العصيان المدني

وقررت انها متتنفسش تاني ولا تمد قلبي بالهواء

السجاير الله يقطعها

انا بحب السجاير

بعشقها

كل ذكرياتي الحلوه كان في ايدي سيجاره

وكل ذكرياتي الوحشه ولعت فيها سيجاره

بكلمكم دلوقتي وانا معايا سيجاره

بحبها

هقول ايه تاني

سيجاره الصبح مع النسكافيه البلاك ابو معلقه سكر واحده

سيجارتين الشغل اول لما اوصل والقهوه تجيلي

سيجاره القهوه التانيه

سيجاره الحاجه الساقعه

سيجاره بعد الاكل

كل حياتي مرتبطه بيها

وكمان علبتين في اليوم كتير

انا عارف انها هتقصف عمري

انا عارف اني لما بطلع السلم بنهج

وكمان عارف انا الدكتور قالي لما شاف الاشعه ان ده صدر واحد بيدخن من خمستاشر سنه

مع اني بشرب من سبعه بس

عارف حجات كتير اوووووي

بس مش عارف ابطل

او بمعني ادق

مش عايز ابطل

الحاجه الوحيده الي مزعلاني

لما بفتكر نفسي زمان

لما كنت بلعب سله

وسبتها ولعبت يد

بفتكر لما كنت انزل الميه مقبش

وبفتكر برضه لما كنت اعوم رايح جي في حمام السباحه من غير ماانهج

بزعل اوي للحاله الي انا وصلتلها

كل ده ولسه متجوزتش ولا خلفت

امال لما اتجوز هشيل المدام ازي واطلع بيها الدور السابع

مش بعيد هي الي تشيلني

هي والبواب وابويا وامي وكمان شويه معازيم

هو انا هعشيهم كده بالساهل

لقد اتخذت قرار ارجوا ان تعينوني عليه

لقد قررت ان اتنحي عن اي نوع من انواع التدخين

عن سيجارتي المفضله

عن الشيشه الاسكندراني والبحريني والقص والمعسل والبايب

قررت ان اتوقف عن التدخين

اعلم انها المره السبع تلاف في مسلسل التوقف عن التدخين

ولكنني ارجوا ان تكون الجزء الاخير لهذا المسلسل

وشكرا للساده المواطنين

ملحوظه

انا هعمل صفحه صغيره كده في الجنب اعد فيها معاكوا الايام الي مشربتش فيها سجاير

وكمان اسفا سوف اغير الصوره الشخصيه بتاعتي الي طالع فيها صباع بيشرب سيجاره

هحط صوره صباع بيشرب عسليه

والله ولي التوفيق