كيف تكسب 10 ك في خمسه ايام
مساء الخير
الساعه تمانيه الاربع
قاعد قدام الجهاز مولع سيجاره وبشرب بريل ومش قادر اتنفس
والسبب ابو العنين
ولمن لا يعرف ابو العينين فهو محل متخصص في الكبد والمخ والجمبري
تاكل من هنا وتلاقي عنيك دخلوا في بعض من كتر الاكل وطلعلك كرش ظريف مينزلش غير بعد سبع تيام
احلي حاجه في ابو العنين انه بيلكم يعني تروح بيتكم وانت مظبط نفسك ان مفيش عشاء وكمان مش غالي اووي يعني
اكله حلوه وسعر مهاود
لو انت ليك في الاقزقزه وبتحب الحمام وورق العنب عليك وعلي فرحات بس امن نفسك عشان فيها خمسينايه ظريفه
لو فكرت تضرب بيتزا من عند لاكزيتا هتكتشف انك بقالك خمسه وعشرين سنه مبتكلش بيتزا
حاجه مختلفه تمام عن الي احنا بناكله ولما سالت ايه السبب افتوني ان الي احنا بناكله ده بيتزا امريكاني اما لاكزيتا فبيعملها ايطالي
لو ليك في الفاست فوود
عليك وعلي سمايل او كوك دووور
مؤمن مبقاش زي زمان
لو اخر الشهر والحياه مقشفره يبقي التابعي او جاد او الشبراوي
لو الحياه ورد ولسه قابض وانت اساسا اكيل وممكن تدوس اطلع علي البرنس بتاع امبابه وعيش حياتك
حمام حوواشي موزه كبده طواجن احمدك يارب
متحاولش تكلمه عشان يجيبلك حاجه دليفري عشان هيقولك الدليفري بيتدي الساعه تسعه بليل
لو ليك في السمك عليك وعلي وادي النيل عنده شويه طواجن جامده
ولو يا باشا بتفكر تحلي عليك وعلي المالكي واضرب شبح او ام علي او رز بالبن بالقشطه بس بلاش مكسرات بيبقي طعمها ووحش
ولو بقي الحياه مقشفره علي الاخر ومش لاقي تشتري كبريت
اعمل زي وحضرلك ساندوتشين الصبح واطلع بيهم علي شغلك
تحت بند
تخاريف
هناك ٦ تعليقات:
على فكرة انت نسيت سيد اذية بتاع النصرية ايه الاكل دااااااا كله انت جوعتنا بس على فكرة دى مش زيادة 10 كيلو بس دى فيها غسيل معدة كمان وهيشلوا الواحد بعد كده بالبلدوزر هههههه
غسيل معده غسيل معده
عض قلبي ولا تعض رغيفي
محمود علي
ادعوك للمشاركة في استفتاء
اكثر 10 مدونات تاثيرا في قرائها
عل مدونتك منهم
اليك الرابط
http://www.6ef.blogspot.com/
ايه يابني الأكل ده كله اللي مليان كوليسترول
جوعتني حرام عليك
الواحد زادله ولا اتنين كيلو وهو بيقري البوست ده:))
صحيح ايه يا عم
انا جالي تخمة من القراية مجرد القراية
الحمد لله على القشفرة
اعتقد انها صحية
هو انت من اللي قلبهم على الرغيف رهيف
بس مؤمن لسه بخير برضوا
لو عاوز تضرب سمك بجد الجد بس تبقى معمر جيبك
اطلع على ابوغالي في مدينة نصر /عباس العقاد
بس اول ماتقبض تروح
يا عم ياعم ممكن العناوين بالتفصيل علىشان الناس اللى ما بتخرجش كتير زى حلاتى، جوعتونا سامحكم الله باظ الريجيم
إرسال تعليق