المصريين ,ونظريه وش المدفع
مشهد واحد
احمد: هاه يا عادل عايزين نقول لبابا يزود المصروف
عادل: ماشي يا عم بس هنقوله ازاي ده لسه قايلي محاضره عن الفلوس وكيفيه التحويش
احمد: طب ايه الحل
عادل: احنا ندخل احنا الاتنين علي قلب رجل واحد ونقوله
احمد وعادل يدخلوا لبابهم ويتحنحوا
عادل : بابا احمد كان عايز يقولك علي موضوع مهم اوووي بس مكسوف انا نازل اصلي العصر وراجع بسرعه سلام يا احمد
مشهد اتنين
مجموعه من عمال احد المصانع عايزين يفاتحوا المدير في انهم مش عايزين ينزلوا ايام العيد شغل
عامل واحد:هاه يا رجاله هنعمل ايه
عامل اتنين: احنا ندخل كلنا ونقوله
عامل تلاته:مانا عارف ان احنا هندخل مع بعض بس مين الي هيفتح الموضوع
عامل واحد: طبعا انت الي هتقول لانك اكبرنا
عامل تلاته: اشمعنا انا يعني هو انا الي هاخد الاجازه لوحدي متقوله انت
عامل واحد:لا يا عم مليش دعوه انت عايز توقفني في وش المدفع انا عندي عيال
مشهد تلاته
طالب عايز يلم شويه طلبه زمايله علشان يقول للدكتور بتاعه انه عايز ياخر معاد تقديم البحث اسبوع كمان
يدخل علي مجموعه طلبه
ا: هاه يا رجاله هندخل للدكتور نقوله دلوقتي
ب:هاه
ا:بقولك هندخل للدكتور عشان موضوع البحث
ب:هاه
ا:انت هتستعبط هتدخلوا معايا ولا لا
ب: هاه
ا:ماشي والله لانا داخل لوحدي
يخرج الطالب وقفاه يقمر عيش من مكتب الدكتور
وش المدفع
المصريين اجدع خلق الله في الجعجعه
بس اول ما يجي وقت الجد تلاقيهم يا فكيك
تابعتوا المشاهد التلاته ايه رايئكم
حصلت مع حد فيكم قبل كده
الشعب المصري بقي شعب جبان خايف علي لقمه العيش ودرس العيال والحوافز والجمعيه بتاعت ست سنيه جارته
منكرش انه ده حقه
بس كمان هو مش بيفكر ياخد حقه بايده
لازم حد تاني هو الي يجي يخده حقه او علي الاقل يشاورله عليه ويمشي قدامه
لازم حد يقف في وش المدفع والمدفع ميضربش عشان الشعب يتاكده انه لو مشي في الطريق ده مش هيموت
ده بالنسبه للشعب
اما بالنسبه للحكومه
قدرت الحكومه ونظام مبارك انه يخرس اي حد عايز يتكلم
خرس الموظفين بالاسعار العاليه والدروس الخصوصيه والاكل والشرب والكادر الجديد
خرس الشباب بالمخدرات والبطاله والبنات العريانه
والباقي الي يفكر يتكلم فيهم اهي المعتقلات موجوده
اي حكومه في العالم مهما كانت درجت فاسدها قدام ثوره شعبها لازم تنحني وتعرف انها مش هتقدر تعمل حاجه
مظاهرات الدعم او زي ماقال السادات عليها انتفاضه الحراميه
خلت السادات يرجع في كلامه ويرجع الدعم
ثوره 19 الي خلت الانجليز يعزلوا المندوب السامي ويفرجوا عن سعد زغلول
المشكله اننا مش عارفين نتحد
مش عارفين نقول لا
فرقتنا الهموم الحزن والكبت ولم تجمعنا
بقي كل واحد خايف علي نفسه وعلي بيته وعلي عياله
ونسيوا ان شجرة الحريه تروي بدما الاحرار
احلي حاجه في الموضوع ده انك بعد متخلصه وجيت قولتلك تطلع معايا في مظاهره هتقولي بكل ثقه
ايه ياعم انت عايز تحطني في وش المدفع!!!!!!!ا
تحت بند
يحدث في مصر
هناك تعليقان (٢):
مش عارفة أعلق و لا كده هبقى في وش المدفع؟؟
ملاحظة في محلها جدا
ثقافة وش المدفع دي متأصلة فينا ...بس هو ايه اللى خلانا كده
ثقافة من خاف سلم
و لا عيش ندل تموت مستور
و لا الجري نص الجدعنة
أكيد كل ده على بعضه خلانا بقينا كده
تحياتي
الجرأة اللي انت عاوزها
محتاجة احساس بالكرامة
والكرامة خلاص دفنت منذ زمن
الخوف بقى سياسة سليمة جدا
تخيل نفسك اخ او اب لبنت
وفكرت تفتح بقك
مش عايزة اكمل
واقولك هاتندم مليون مرة انك فتحت بقك
المسالة ما بقتش خوف على لقمة العيش وبس
حتى اللي كان عندهم استعداد يتكلموا
بقوا بيخافوا على اعراضهم
واعتقد الاعراض بتنتهك بكل سهولة
وكل واحد هو الجاني على روحه
التمسوا العذر للناس
لكن دا ما يمنعش ان في ناس لسه ايمانها اقوى من اي شيء وخوفها من ربنا بس
إرسال تعليق