اختر من بين القوسين
ايهما تفضل مع التحليل (الاخوان المسلمين , جمال مبارك)ا
اتفتح قدامي نقاش بناء علي انتخابات مجلس الشوري مضمونه ان جمال مبارك هيكسب هيكسب بناء علي الي حصل من تزوير في الانتخابات الاخيره
بما اني كنت الاصغر في النقاش قعدت لما سمعت كل الاراء ورميت سوال صغير
هو الاخوان احسن في الحكم ولا جمال مبارك
واحده واحده ونتكلم عن الاتنين بموضوعيه
اولا جمال مبارك
مميزاته
انا مش لاقي لجمال اي مميزات لحد دلوقتي
حتي في احاديثه محستش ان هو قادر اني يجبرني علي احترام تفكيره او حتي اراءه
حديثه مع لميس الحديدي كان باهت ومفهوش اي اراء قويه
محسيتش ان هو محنك سياسيا او ليه اراء اقتصاديه هدافه
عيوبه
جمال مبارك عنده عيب خطير وهو انه ابن الرئيس وده عيب لان في ناس كتير هتكره لمجرد انه ابن حسني مبارك حتي لو كان هو شخصيه كويسه
جمال مبارك ممكن نقول ببساطه انه مولود وفي بقيه معلقه فضه بلاش دهب
ليه
لانه مركبش ميكروبصات اول عباس الساعه تمانيه الصبح
وموقفش في شباك تذاكر سينما مترو اول يوم العيد
ومخدش درس خصوصي عند استاذ ختت علشان ينجحه
ومدخلش جامعه حكوميه الدكاتره الي فيها كفيلين انهم يكرهوا اي انسان في عيشته
ومتخرجش قعدله سنتين تلاته علي القهوه لحد ما لاقي شغل
ومعملش جمعيه مع طوب اارض علشان يجيب غساله فول اوتوماتيك عشان يتجوز
كل ديه اسباب تخليه مش حاسس باحوال الشعب المصري
ثانيا
الاخوان المسلمين
مميزاتهم
مساعده الناس
قدرتهم علي التواصل مع عامه الشعب واحساسهم بمشاكلهم
محاوله الحد والكشف عن الفساد المستشري في البلد
منظمين الي حد ما وخلي بالكم من النقطه ديه علشان هذكرها في العيوب
محاربه الحكومه والنظام للاخوان خليت الاخوان ياخدوا بنط عند الشعب
العيوب
الاخوان عندهم مشكله كبيره من وجهه نظري
انهم منظمين في التحرك وغير منظمين في التفكير
معندهومش خط واضح وصريح ماشيين عليه
هما عايزين يوصلوا للحكم وبعد كده مضرح ما ترسي دقلها
علاقاتهم باسرائيل هتكون عامله ازاي
علاقتهم بالغرب وخاصه امريكا
كيفيه تعاملهم مع المسيحين
كيفيه تعاملهم مع السياح والاماكن الي بتقدم خمور وبيسمح فيها بالقمار
كل الحجات ديه انا مش فاهمها في الاخوان وهما مش بيعلنوا عنها
الحركه المستفذه الي عملوها شباب الاخوان في جامعه الازهر بتاعه العرض العسكري
والرد الباهت الي قاله المرشد
كل ديه اسباب متخلينيش اثق في الاخوان
والاسف هما دول بس القوي السياسه الي موجوده في مصر دلوقتي
بالنسبه للاحزاب فانسب تعليق نقوله عليهم هو الضرب في الميت حرام
تفتكروا لما التتار يدخلوا مصر ويحبوا يكلموا المسئول عن الشعب المصري هيكلموا مين
اتصل ب 140 دليل وانت تعرف
هناك ١٢ تعليقًا:
طيب انت ما قلتش اختيارك ايه من بين القوسين
على اساس ان مفيش غير هم الاختيارين دول
انا عن نفسي نفسي ييجي على اليوم اللي اشوف فيه رئيس تاني بيحكم مصر
ان شالله يكون مين
جمال
المهدي عاكف
المهم اصدق ان ممكن اشوف رئيس تاني
بس بعيدا عن كل ذلك
الاخوان تكتل منظم جدا
في افكارهم وفي تحركاتهم
واي تكتل سياسي من الطبيعي جدا انه
مايكشفش ورقه كدا خاصة في ظل الاوضاع الحالية
وبالنسبة لكل النقاط اللي انت تساءلت عن مواقفهم بالنسبة لها
اعتقد هم وضحوها اكتر من مرة وفي اكثر من موقف
وحتى لو وحشين
اهو تغيير
نفسي قبل ما اموت
اشوف حد تاني بيحكم مصر
انا معترض معاكي في الي انتي قولتيه
الموضوع مش موضوع انه يحرق كروت
هي مش لعبه كوتشينه ده مستقبل بلد وحياه ناس
لازم نعرف احنا ليه هنختار الاخوان علشان يحكمونا
علشان لو منفذوش الي هما قالوه
نحاسبهم
السياسة طول عمرها لعبة
وهي لعبة قذرة جدا
والالعاب القذرة عمر ما كان من قوانينها الوضوح
والاخوان ينطبق عليهم انهم تنظيم سياسي تحت عباءة الدين
وبيلعبوا طبقا لقوانين اللعبة اللي هما دخلوا نفسهم فيها
يعني ما نقدرش نلوم عليهم
وبرغم كل دا
هم على الاقل لهم المميزات اللي انت عديتها
ورءوسهم دايما بيرددوا ان مثلا موقفهم من المسيحين هو موقف الدين الاسلامي من اهل الذمة
يعني التعامل معاهم هيكون حسب تعاليم الدين
وموقفهم من اسرائيل
ليس ادل على وضوحه من
ان حركة حماس هي حركة يدعمها الاخوان تماما
الفيصل هو
هل الناس حاليا في حالة تسمح بالنقلة دي
من طبيعة الحكم الحالي
الى ما يدعيه الاخوان من انهم يدعون اليه
حتى الاخوان لو وصلوا للحكم
هتلاقي الجبهة السلفية المعارضة
التي تردد ان الاخوان يتاجرون بالدين
وكل هدفهم هو السياسة
الاخوان لازم يلعبوا بالقوانين المفروضة حاليا
والا يطلعوا برا اللعبة
ما علينا
لو الاخوان حركه سياسيه تحت عباء الدين زي ما انتي بتقولي
يبقي لازم نحاربها مش نشجعها
مينفعش يلعبوا العاب
لاحظي ان احنا بنتكلم عن بلد فيها خمسه وسبعين مليون مواطن
بيتلعب بيهم من خمسه وعشرين سنه
كفايه لعب بقه
شوفت
الموضوع دا شكله معقرب
كتبت تعليق
والنت فصل
انا لما قلت ان الاخوان تنظيم سياسي تحت عباءة الدين
مش قاصدة انهم بيدعوا
لكن قصدي انهم بينادوا بوضع سياسي ديني
وان الاسلام دنيا ودين
لكن قلت هم دخلوا المطبخ السياسي
وبيستخدموا الادوات المتواجدة به
وقدر امكانهم مش بينغمسوا
لكن اكيد بيضطروا انهم يستخدموا نفس اسلوب الطهي
لكن في النهاية
الانسان لما بيكون مضطر انه يختار
بيختار افضل ما هو متاح
واعتقد انهم افضل ما هو متاح لنا اختياره
دا على اساس اننا بنحلم وبنفترض اننا بنختار
واحنا كمجتمع محتاجين مرحلة انتقالية علشان نقدر نصنع ختيارتنا بنفسنا
محتاجين ان يتم بنائنا نفسيا وفكريا من جديد
وانا رايي مجرد رايي الشخصي انا الاخوان هم افضل مرحلة انتقالية بالنسبة لنا
انا مش مقتنع بالكلام ده
منكرش ان في ناس كتير من الاخوان كويسين وانا بحترمهم
بس هتنضمني منين انهم بعد كده ممكن يتاثروا بموقف معين او يغيروا من كلامهم بناء علي تاثير الجماعه نفسها
please visit, thank
مفيش ضمانات
احنا وضعنا محتاج المجازفة
واما نختار من المتاح
او نبقى كما نحن
او قولي انت ايه الحل
كلامي دا مجرد وجهة نظر شخصية
مستعدة للتنازل عنها
بس اديني بديل واقعي متواجد اقتنع بيه
اولا اختارليك اي اسم حركي اكلمك بيه
مش كل ما اكلمك اقولك يا ما علينا
مفيش حاجه اسمها مجازفه
في حاجه اسمها عقل وديموقراطيه وشعب يختار رائيسه ويتحمل مسئوليه اختياره
والرئيس ده يكون راجل بيفهم
مش متطرف او فاسد او جبان
ولازم يكون عارف مدي سوئ البلد
وبالنسبه لموضوع البديل الواقعي
مصر فيها خمسه وسبعين مليون بني ادام
شيلي منهم الاخوه المسحيين
شيلي منهم الاطفال والنساء والاميين
شيلي منهم العسكريين
هيتبقي حوالي خمسه مليون بني ادام اختاري واحد منهم
بأي حال من الأحوال احنا مش هنقبل ننصب جمال مبارك كرئيس جمهورية
مش هينفع فأحسنله ينسي
حتي لو حصل ضد رغبة الشعب فمش هيستمر كتييير
لازم الركان المصري ده ينفجر قريب عشان بقاله كتييير قوي بيغلي
بالنسبة للأخوان أنا متفقة معاك أنهم مش واضحين في بعض المناطق بتلاقي نفسك مش عارف تحددلهم سياسة معينة
يعني ممكن نقول ان جمال والأخوان متساويين في انهم مجهولي السياسة العامة
مع الفارق طبعا ومع العلم والافتراض ان جمال أكيد أكيد هيمشي علي نهج السيد الوالد وده اللي مش ممكن نقبله
في النهاية أي حد ان شاء الله يكون عامل من بتوع النظافة يمسك الحكم بس المهم يكون بيحب البلد دي قوي ويكون عارف ازاي يطلع بيها لقدام
لأنها شافت كتييير
وكفاية عليها لحد كدة
الله اكبر
هو ده الكلام
قولي لي ما علينا والنبي
فينك من بدري يا وحش
بقالك يومين مستخبيه
اغنيه منير في الجون
الموضوع جميل جداً بس المشكلة أن فعلاً مفيش حد فيهم عدل الاتنين أنتن من بعض لأنهم كلهم بيفكروا في نفسهم وبس مش في الشعب الغلبان اللي طلعان عينه وخلاص صلاحيته انتهت ولا الشباب اللي فقدوا الأمل في كل حياتهم ومستقبلهم
للأسف مفيش اللي نحتاجه بجد للتغيير واللي يفكر في أهل البلد دي وشبابها
إرسال تعليق