شعب مكبوت
احنا شعب مكبوت
انا وانت وانتي
كلنا عندنا كبت
كبت فكري وحركي وجسدي وعاطفي
الطفل المصري بيتولد طبيعي جدا
زي القمر زي كل الاطفال
يبتدي يروح المدرسه يجيله كبت فكري لانه مش مقتنع بكلام المدرس
يكبر شويه ويحب يلعب رياضه يجيله كبت جسدي لانه الشارع مليان عربيات ومركز الشباب بيشربوا فيه بانجو
وابوه مش مشترك في نادي
يكبر شويه وقلبه يدق يلاقي عنده كبت عاطفي لانه علاقته بالبنت الي هو بيحبها المجتمع بيبصلها نظره مش ولابد
وكمان المجتمع مش سامحله انه يكون صديق البنت ديه يعني لاحب ولا صداقه
بالتبعيه نفس الموقف بيحصل مع البنات بس بطريقه اعلي بالتاكيد لانهم بنات
اكبر دليل علي ان احنا عندنا كبت
الكلام الي انا بكتبه دلوقتي ده والي حضرتك بتقراه
المدونات ديه بينت ان احنا عندنا كبت فكري كبير جدا
كل واحد بقي عنده مدونه
الي بيكتب في الحب
والي بيكتب في السياسه
والي بيكتب في الجنس
وعلي كل لون يا بتستا
الدوله بالتاكيد ليها دور كبير في الكبت الي عندنا ده
بس كمان مننكرش ان البيت ليه دور اكبر
تفتكرو لو ربنا كرامكوا بعد خمسين سنه واتجوزتوا هتربوا عيالكم علي الكبت برضه؟؟؟؟؟؟؟؟؟؟
تحت بند
تخاريف
هناك ٦ تعليقات:
السلام عليكم
كالعادة الموضوعات اللي حضرتك بتعرضها رائعه
و بتفتح مجالات لمناقشة الارآء
انا من رأييء لكل كبت حل
المجتمع و مستوي المعيشة
بيفرض علينا واقع
لابد أن نتعايش معاه
و فعلا المعظم بينجح في التعايش دا
المدونات فعلا بتحل كبت الكتابة
و نشر الأفكار
و دا شيء بعتبره رائع
بس في حدود
محدش يفتكر حرية الرأي
الكلام الإباحي أو اللي يخدش الحياء
و للأسف بعض الناس
فاكرين كده
-------------
بس ليا كمان تعليق
علي جزئية علاقة الولد و البنت
و نظرة المجتمع؟
أنا مش بقول الحب حرام
بس العلاقات العاطفية و الغرامية
و الكلام دا حرام
و للمجتمع حق إنه يرفضها
دا مش تخلف و لاتأخر
دا قمة التحضر
لأن دا الشرع و دينا بيقولنا كده
لو بيحبها يروح يتقدملها**
!!!!!!!!!!!
كمان الصداقة
أنا ضد جدااا صداقة الولد و البنت
ممكن نسميها زمالة
لكن صداقة
صعبة و غلط
--------------
تحية و تقدير للموضوع الرائع
و أتمني إني أكون وضحت وجهة نظري
و السلام خير ختام
والله مانا عارفة هاربي ولادي ازاي في البلد دي
الواحد متلخبط أمال العيال هيعملوا ايه؟
ربنا يستر عليهم وعلينا
عقد الياسمين
مرسيه جدا علي رائيك
الي انا شايف ان هو في محله
بس اناهختلف معاكي في موضوع الولاد والبنات
معتقدش ان اي ولد لما يحب بنت هيروح لابوها
لاسباب كتير احنا الاتنين عرفنها
اما بالنسبه للصداقاء
مدام قدام الاهل
وفعلا صداقاء
ميكونش فيها مشكله
انا عن نفسي ليه اصدقاء بنات وعلاقتنا كلها احترام
وادب
فنان فقير
منوراني دايما يا قمر
لو زرعتي في اولادك افكارك واهتمامتك الي انتي بتقوليها في مدونتك يبقي بالتاكيد هيتطلعوا عيال زي القمر لمامتهم
الثائر على الاوضاع
ازيك يا محمود
فعلا احنا شعب مكبوت
كلنا
حتى اهالينا
كله كبت في كبت
لان التربية من الاساس غلط في غلط
المعتقدات اللي بتكبر جوانا من صغرنا
بيكون اكبر دعامة فيها هي
الخوف
ومن خاف سلم
كلنا عندنا قهر نفسي
لأشياء معينة
وهاقولك حاجة
في ناس كبتها وخوفها اقوى منها
لدرجة انهم حتى لا يملكوا الجرأة انهم يخرجوه في مدونة
او بينهم وبين نفسهم
ما علينا
بصراحة الموضوع جميل جدا
ومحتاج روقة
بس الامتحانات بقى
سلام ايها الثائر
جميله
عجبتني اووي كلمتك
"في ناس كبتها وخوفها اقوى منها"
كلمه في الجون وضحت حجات كتير اوووي كنت عايز اقولها
انشاء الله تحلي كويس في الامتحنات
وتجيبي جيد جدا
هتوحشني ردورك
عايز الحق والله عندك حق في كل كلمة بتقولها بس بقى أتمنى أنك كنت تضيف رأيك في إننا إزاي بقى نخرج من الحالة اللي أحنا فيها أو على الأقل نفكر في الحاجة اللي تبعد عنا الكبت ده شوية وتخرجنا من الحالة دي للأبد
في الآخر لازم أهنييك وأحييك جداً على كلامك لأنه بجد ومن الآخر كده كلام جميل جدا وواقع إحنا فيه ً
إرسال تعليق