رساله من السيد الرئيس
الدستور اليومي بتاريخ28/6/2007
يا شعبي حبيبي يا روحي يا بيبي يا حطك في جيبي يا ابن الحلال
يا شعبي يا شاطر يا جابر خواطر يا ساكن مقابروصابر وعال
يا واكل سمومك يا بايع هدومك يا حامل همومك وشايل جبال
يا شعبي اللي نايم وسارح وهايم وفي الفقر عايم وحاله دا حال
أحبك محشش مفرفش مطنش ودايخ مدروخ واخر انسطال
أحبك مكبر دماغك مخدر ممشي امورك كده باتكال
واحب الي ينصب واحب الي يكدب واحب الي ينهب ويسرق تلال
واحب الي شايف وعارف وخايف وبالع لسانه وكاتم ما قال
واحب الي قافل عيونه المغفل واحب البهايم واحب البغال
واحب الي راضي واحب الي فاضي واحب الي عايز يربي العيال
واحب الي يائس واحب الي بائس واحب الي محبط وشايف محال
واحبك تسافر وتبعد تهاجر وتبعت فلوسك دولار او ريال
واحبك تطبل تهلل تهبل عشان ماتش كوره وفيلم ومقال
واحبك تايد تعضد تمجد توافق تنافق وتلحس نعال
تحضر نشادر تجمع كوادر تلمع وتقمع وتضبط مجال
لكن لو تفكر تخطط تقرر تشغللي مخك وتفتح جدال
وتبداء تشاكل وتعمل مشاكل وتنكش مسائل وتسال سؤال
وعايز تنور وعايز تطور وتعمللي روحك مفرد رجال
ساعتها هاجيبك ..ولايمكن اسيبك وراح تبقي عبرة وتصبح مثال
هابهدل جنابك واذل اللي جابك وهيكون عذابك دا فوق الاحتمال
وامرمط ساعتك واهزا سيادتك واخللي كرامتك في حاله هزال
وتلبس قضيه وتصبح رازيه وباقي حياتك تعيش في انعزال
هتقبل هاحبك ..هترفض هلبك هتطلع هتنزل هاجيبلك جمال
هناك ٩ تعليقات:
هتقبل هاحبك ..هترفض هلبك هتطلع هتنزل هاجيبلك جمال
هههههههههههههههههه
لا ده امر واقع مفروغ منه سواء قبلنا او رفضنا
اسلوب ساخر وجميل جدا لخص حالة الشعب فعلا وحالة حكومتنا
الشعب ده ليه الجنه بجد
ده أنت اللي كاتبه يامحمود؟؟؟؟
أصلي حاسة اني قريت حاجة شبه كدة قبل كدة:))
أو يمكن الفكرة متشابهة
عموما حلو قوي
وشكرا لسيادة الريس بيعرفنا برده وبينورنا كتر خيره الراجل هيعمل ايه أكتر من كده يعني؟
هتقبل هاحبك ..هترفض هلبك هتطلع هتنزل هاجيبلك جمال
بس والنبي ياريس تنسي حكاية جمال دي
انسي ياعمرو
قصدي انسي ياريس
بس هو انت من امتي ياريس بتحب اللي فاضي؟
ماتصحي معايا كدة الفاضي يعمل قاضي وبعدين يبتدي يشغل مخه ويفكر
انت عاوز ناس هلكانين مطحونين يروحوا بيوتهم مش قادرين يدوبك يتفرجوا علي فيلم عربي ولا فيلمين وبعدين تبص تلاقيهم مقلوبين نايمين
:))
لا للاسف مش انا الي كاتبه
هو انا لو كتبت حاجه زي دي عقعد في بيتنا يومين ورا بعض
وكمان انا كاتب فوق العدد بتاع الدستور
يبقي بالتاكيد اتنشرت في الدستور
ههههههههههههههههه
هو ايه الحكاية دي تاني مدونة اشوف فيها القصيدة دي بعد ما اتبعتتلى على الايميل
هي قصيدة جامدة و احلى ما فيها النهاية المنطقية
تحياتى للجرأة
هو شاعر مجهول صح
لازم يبقى مجهول
لانه لو معروف هيبقى نشرف فى هيلتون ابوزعبل
هههههههههه
لا يا عم انا مليش دعوة انا مش هعقل ولا هقول ان القصيده حاوة ولا اناالاخيار هايل ولا اى حاجه من دى
انا عندى رسومات عاوزة اربيها
انا قريت القصيدة دى فى مدونة قبل كده واتبعتتلى على الايميل وعجبانى جدا
بس انا شايفة انكوا زعلانين اوى من ابو جمال ومضطهدينة مع ان الراجل غلبان واسمع القصيدة دى بتقولك ايه
قريتها فى منتدى واحتفظت بيها
أنا مبخافشى وحفضل أقول
كلمـة حــق و عليها مسئـول
إن الريس راجــل طيــب
وبشعبه دايما مشغـــــول
مشغول انه يلم فلوسنا
بره سويسرا يحوشهالنا
وفحسابات سريه يشيلها
نفسه يأمن مستقبلنا
شفتوا ازاى بقى قلبه رحيم
عنده ايمان وضميره سليم
بيجوعكوا لجل تخسوا
آه يا شعب يا محتاج لرجيم
من جهلكوا بتقولوا بطاله
وان الاحوال مش شغّاله
دا الراجل نفسه يريحكم
هى الراحة تبقى عوالة ؟
أما حكاية المنتجعات
ليه تسموها المعتقلات ؟
ليه الظن وسوء النيّة
نفسه يفسحكوا يا بهوات
أما الكرسى واللى اتقال
دا كلام مش محتاج لسؤال
الغلطه دى غلطتنا يا عالم
إن مجبناش كرسى تيفال
يا جدعان انتم ظالمين الراجل
ضيّع عمره ومين يستاهل
حتى الاكل بياكله بدالنا
طالع واكل نازل واكل
بعد دا كلّه........ تسأل ماله الريس؟؟؟؟؟؟؟؟؟؟؟
يا سلام عليك وعلى كلامك الدراما والعبر كلام في الجون بصحيح وللأسف هي دي الحقيقة المرة اللي صوت واحد بس ميقدرش يغيرها محتاجين أصواتنا كلنا شبابنا ورجالنا وشيوخنا وأطفالنا شعبنا كله علشان نقدر نعمل التغيير للأحسن
أما غير كده بقة فجمال جاي جاي وأكيد جداً جاي
حلوة
من كاتبها؟
إرسال تعليق