أعتقد ان مصر لسه بخير

مش عارف ليه اليومين دول بقيت متفائل جدا

كل حاجه بشوفها غلط بلاقي فيها امل لبكره

مواقف كتير بكتشفها يوميا في المصريين

ممكن كنت زمان بشوفها بس مكنتش بعتبرها حاجه مهم اووي

يمكن لاني كنت متشائم اكتر

مره كنت مسافر مرسي علم والاتوبيس فاتني قمت واخد تاكسي وعلي طريق مصر السويس وطيران يا معلم

سلمت للسواق بتاع التاكسي عشرين جنيه (وسيجاره كنت تسعه) وقولته اجري

بعد ربع ساعه في طريق مصر السويس لقيت نقطه مرور فيها عسكري غلبان سالته علي الاتوبيس قالي انزل استناه هنا ونحاول نوقفه نزلت جري من التاكسي ووقفت مع العسكري نشرب في شاي ونولع في سجاير.

لحد ما اتاكدت ان الاتوبيس فاتني يلا مش مهم

كل الرغي الي انا قولته ده ولسه مقولتش انا متفائل ليه

لفيت الناحيه التانيه وقولت اخد اي حاجه اروح بيها

اكتر من خمس عربيات تقف وتقولي رايح فين الي رايح الرحاب والي رايح التجمع الخامس وكلهم يعرضوا عليه يوصلوني تقولش موزه واقفه في جامعه الدول

والمشكله ان انا مكنتش رايح ولا مكان من دول ومعايه شنطه داهيه مينفعش اركب وانزل تاني من اي مواصله غير في المكان الي انا رايحله

ده اول موقف

تاني موقف كنت راكب المترو ومروح وشويه شباب عساسيل بيعاكسوا بنتين

لحد ما واحد بيهزر مع التاني قام راميه علي بنت فيهم

قامت مهزاه قام شاتمها

وبس يا معلم وهوجه عرابي بدات

نص عربيه المترو بدات شتيمه وتهزيق في العيال

لحد ما نزلوا المحطه الي بعديها

مش عارف ليه ساعتها فرحت اوووي وحسيت ان لسه بناتنا ممكن تمشي في الشارع بامان

تالت موقف وده الاخير كنت مسافر اسكندريه وفيه عربيه اتقلبت قدامنا علي الطريق

اكتر من تسع عربيات بما فيهم الميكروباص الي كنت راكبه وقفوا

وجري علي العربيه المقلوبه

الي بيجيب طفايه حريق والي راح علي الواد يطلعه شباب ورجال زي الورد

اشتركوا مع بعض في حاجه واحد وهما ميعرفوش بعض وهما ميعرفوش الواد الي بينقذوه

والله بلدنا لسه فيها أمل